सावधान! नागपुरात कोरोनाचं संक्रमण वाढण्याची शक्यता; आज आठ बळी ३३२ नवे बाधित

राजेश प्रायकर 
Friday, 6 November 2020

जिल्ह्यात आज ग्रामीणमध्ये दोन तर शहरात सहा जणांच्या मृत्यूची नोंद करण्यात आली. जिल्ह्याबाहेरील एकाने शहरात शेवटचा श्वास घेतला. त्यामुळे कोरोनाबळींची संख्या ३ हजार ४५६ पर्यंत पोहोचली आहे.

नागपूर ः दिवाळीनंतर कोरोनाचे संक्रमण वाढण्याची भीती तज्ज्ञांनी व्यक्त केली असून गेल्या काही दिवसांत अडीचशेपेक्षा कमी झालेली बाधितांच्या संख्येने पुन्हा तीनशेवर गेली. शहरातील विविध लॅबमधून आलेल्या अहवालातून आज ३३२ नवे बाधित आढळून आले. शुक्रवारी जिल्ह्यात आठ बळींची नोंद करण्यात आली. सद्यःस्थितीत जिल्ह्यात साडेतीन हजार रुग्ण उपचार घेत आहेत.

जिल्ह्यात आज ग्रामीणमध्ये दोन तर शहरात सहा जणांच्या मृत्यूची नोंद करण्यात आली. जिल्ह्याबाहेरील एकाने शहरात शेवटचा श्वास घेतला. त्यामुळे कोरोनाबळींची संख्या ३ हजार ४५६ पर्यंत पोहोचली आहे. यात शहरातील २ हजार ४४४, ग्रामीणमधील ५७९ तर जिल्ह्याबाहेरील ४३३ जणांचा समावेश आहे. शहरातील विविध लॅबमध्ये ४ हजार ४४३ जणांच्या नमुन्यांची तपासणी करण्यात आली. 

हेही वाचा - प्रवासादरम्यान नेहमी मळमळ आणि उल्टीचा त्रास होतो? घाबरू नका पुढील उपाय नक्की करून बघा

यातून ३३२ जणांचा अहवाल पॉझिटिव्ह आला. शहरातील १९५ तर ग्रामीण भागातील १३६ जण आज बाधित झाल्याचे निष्पन्न झाले. बाधितांची संख्या आज पुन्हा तीनशेपेक्षा जास्त दिसून आली. शहरातील एकूण बाधितांची संख्या १ लाख ४ हजार ५०९ पर्यंत पोहोचली. यात ग्रामीण भागातील २१ हजार ३०५ तर शहरातील ८२ हजार ५८९ जणांना आतापर्यंत कोरोनाची बाधा झाली. 

जिल्ह्याबाहेरील ६१५ जणही शहरात तपासणी केली असता पॉझिटिव्ह आढळून आले. गेल्या काही दिवसांत दैनिक बाधितांचा आकडा अडीचेपेक्षाही खाली आला होता. आता पुन्हा तीनशेवर बाधित आढळून येत असल्याने प्रशासन चिंतातुर दिसत आहे. दिवाळीच्या पार्श्वभूमीवर नागरिकांची गर्दी वाढली असून वाढत्या थंडीमुळे कोरोना संक्रमण वाढण्याची भीती व्यक्त केली जात आहे. कोरोना पुन्हा वाढण्याची ही सुरुवात तर नाही ना, अशी शंका व्यक्त केली जात आहे.

अधिक माहितीसाठी - शेतातील पडक्या खोलीतून येत होती दुर्गंधी; मित्राच्या सांगण्यावरून जाऊन बघितले असता आढळला महिलेचा कुजलेला मृतदेह

९७ हजारांवर रुग्ण कोरोनामुक्त

जिल्ह्यात आज ३६६ जणांना कोरोनावर मात केली. शहरातील २६७ तर ग्रामीण भागातील ९९ जण कोरोनामुक्त झाले. त्यामुळे कोरोना मुक्त झालेल्यांची संख्या ९७ हजार ४९८ पर्यंत पोहोचली आहे. कोरोनामुक्त झालेल्यांचा दर ९३.२९ टक्के आहे. आतापर्यंत ग्रामीणमधील १९ हजार ९८६ तर शहरातील ७७ हजार ५१२ जण कोरोनामुक्त झाले. दिवाळीतील फटाक्यांच्या प्रदूषणामुळे आरोग्य यंत्रणेचे कोरोनामुक्त झालेल्यांवरही नजर राहणार आहे. सध्या जिल्ह्यात तीन हजार ५५५ रुग्णांवर उपचार सुरू आहेत. 

संपादन - अथर्व महांकाळ 


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: corona affect might will get increased in nagpur