‘मी दिल्ली विमानतळावर आहे, मौल्यवान सामान सोडवण्यासाठी पैशांची गरज आहे’ असं म्हणत केली फसवणूक

नागपूर : फेसबुकवरून मैत्री झालेल्या लंडनच्या महिलेने लक्ष्मीनगरातील वृद्धाला जाळ्यात अडकवून ९ लाख ८५ हजारांनी फसवणूक केली.

पोलिस सूत्राकडून मिळालेल्या माहितीनुसार, लक्ष्मीनगरातील रहिवासी ६६ वर्षीय अनिल मुलावकर हे खासगी कंपनीतून निवृत्त झाले आहेत. लंडन येथील लिंडा थॉमसन नाव सांगणाऱ्या महिलेने ऑक्टोबर २०२० मध्ये फेसबुकवरून फ्रेंड रिक्वेस्ट पाठविली. मुलावकर यांनी सहजतेने ती स्वीकारली. त्यानंतर चॅट सुरू झाले. भारतात येणार असून आल्यावर भेटणार असल्याचेही तिने सांगितले होते.

७ ऑक्टोबरला लिंडाने भारतात आल्याची आणि दिल्ली विमानतळावर कस्टम विभागाने मौल्यवान सामान जप्त केल्याची बतावणी केली. सोबतच दंड भरण्यासाठी भारतीय चलनाप्रमाणे ९५ हजार रुपयांची तातडीने गरज असल्याचे सांगितले. कस्टम विभागाच्या अधिकारी असल्याचे सांगून एका महिलेशी बोलणेही करून दिले.

नक्की वाचा - बारा मुलींचा पार्थिवाला खांदा, लाडक्या वडिलांना लेकींचा अखेरचा निरोप

तिच्यावर विश्वास ठेवत मुलावकर यांनी तिच्या खात्यात पैसे पाठविले. दुसऱ्या दिवशी पुन्हा लिंडाने फोन करून तीन लाख रुपयांची मागणी केली. बँक खाते लंडनचे असल्याने पैसे काढू शकत नसल्याचे तिचे म्हणणे होते. टप्प्याटप्प्याने ९.८५ लाख घेतल्यानंतर तिचा फोन बंद झाला. फसवणूक झाल्याचे लक्षात येताच मुलावकर यांनी तक्रार नोंदविली. त्याआधारे बजाजनगर पोलिसांनी फसवणुकीचा गुन्हा दाखल केला आहे.