हुंडाबळी : ‘माझ्या मुलाचा चांगला सांभाळ करा’ अशी चिठ्ठी लिहित महिला डॉक्टरने घेतला गळफास

नागपूर : पती व सासूकडून हुंड्यासाठी होणाऱ्या छळाला कंटाळून होतकरू महिला डॉक्टरने गळफास लावून जीवनयात्रा संपविली. मंगळवारी सकाळी ही दुर्दैवी घटना बेलतरोडी हद्दीतील नरेंद्रनगरात उघडकीस आली. याप्रकरणी पोलिसांनी हुंडाबळीचा गुन्हा नोंदवीत डॉक्टर पतीला अटक केली आहे.

पोलिसांनी दिलेल्या माहितीनुसार, डॉ. रुचिता रेवतकर (३०) असे मृताचे तर मंगेश रेवतकर (३७) असे आरोपी पतीचे नाव आहे. या प्रकरणात सासू सुनंदा (५२) हिलाही आरोपी करण्यात आले आहे. रेवतकर कुटुंब उपेंद्र अपार्टमेंट, नरेंद्रनगर, सिद्धीविनायक मंदिरामागील रहिवासी आहे.

क्लिक करा - शेतकरी दिवस : चौधरी चरणसिंह  केवळ सहा महिने पंतप्रधान असूनही त्यांच्या काळात शेतकरी होते सुखी

रुचिता व मंगेश यांना सहा वर्षांचा मुलगाही आहे. मंगेश धंतोलीतील खासगी रुग्णालयात कार्यरत आहे. त्याने एप्रिल २०१६ पासून माहेरून पैसे आणण्यासाठी रुचिता यांचा छळ सुरू केला होता. सुनंदा मुलाला त्यासाठी चिथावणी देत असल्याचे सांगण्यात येते.

मंगळवारी सकाळी रुचिता व मंगेश यांच्यात वाद झाला. रुचिता यांनी नेहमीच्या कटकटीला कंटाळून जीवन संपविण्याचा टोकाचा निर्णय घेतला. पंख्याला ओढणी बांधून गळफास घेतला. सकाळी ९ वाजता मंगेशलाच त्या गळफास लावलेल्या दिसल्या. पोलिसांनी घटनास्थळावरून आत्महत्येपूर्वी लिहिलेली रुचिता यांची चिठ्ठी जप्त केली आहे.

हेही वाचा - अचानक आला एकुलत्या एक मुलाच्या निधनाचा फोन; कुटुंबासह गावात पसरली शोककळा

चिठ्ठीत माहेरून पैसे आणण्यासाठी पती व सासू छळ करीत असून त्याला कंटाळून आत्महत्या करीत असल्याचे त्यांनी स्पष्ट लिहिले आहे. माझ्या मुलाचा चांगला सांभाळ करा, अशी सूचनाही तिने केली आहे. याप्रकरणी बेलतरोडी पोलिसांनी हुंडाबळीचा गुन्हा दाखल करीत मंगेशला अटक केली आहे.

संपादन - नीलेश डाखोरे