मध्यरात्री भरचौकात कार आणि दुचाकीमध्ये झाला अपघात; भांडण सोडवत असतानाच पोलिसांना केली शिवीगाळ

नागपूर : कार आणि दुचाकीमध्ये अपघात झाल्यानंतर दोन गटांत राडा झाला. मध्यस्थी करण्यास आलेल्या पोलिसांनाही युवकांनी शिवीगाळ केली. याप्रकरणी प्रतापनगर पोलिसांनी सात जणांविरुद्ध गुन्हे दाखल केले आहे.

पोलिसांनी दिलेल्या माहितीनुसार, शनिवारी मध्यरात्रीच्या सुमारास सम्यक भीमराव गजभिये आणि स्वप्नील दिलीप गजभिये हे दोघे कारने जात होते. रेडिसन ब्ल्यू हॉटेल चौकात दुचाकीने राहुल सुरेश सोमकुवर जात होता. कार आणि दुचाकीमध्ये अपघात झाला. राहुल आणि स्वप्नीलमध्ये बाचाबाची झाली. दोघांनीही आपापल्या मित्रांना घटनास्थळावर बोलावले.

अधिक वाचा - सकाळच्या वेळी शेतातून येत होता खळखळ आवाज; जाऊन बघताच तळपायाची आग गेली मस्तकात

तेथे आरोपी गौरव पाटील, कल्पेश हिवाळे, आशिष गजभिये, राहुल लांबट आणि मेघराज गवकरे पोहोचले. दोन्ही गटात हाणामारी झाली. घटनास्थळी पोहोचलेल्या प्रतापनगर पोलिसांनी भांडण सोडविले. परंतु, आरोपींनी पोलिसांना शिवीगाळ केली. याप्रकरणी सातही जणांविरुद्ध गुन्हे दाखल करण्यात आले.

युवकांवर प्राणघातक हल्ला

वंजारीनगर पाण्याच्या टाकीजवळ सूरज उर्फ गोलू सराटे (रा. इंदिरानगर) याच्यावर आरोपी दिनेश राही आणि आकाश व्यास या दोघांनी चाकूने हल्ला केला. गोलूसोबत दिनेशचा जुना वाद होता. शनिवारी रात्री नऊ वाजता गोलू हा दारू पिऊन वंजारीनगर चौकातून जात होता. त्याला आरोपी दिनेश आणि आकाशने गाठले. त्याच्यावर चाकूने हल्ला करीत ठार मारण्याचा प्रयत्न केला.

जाणून घ्या - खुनाच्या घटनेनं हादरली उपराजधानी: उपमुख्यमंत्री जाताच कुख्यात गुंडाचा दगडानं ठेचून खून 

मात्र, लगेच अजनी ठाण्यातील पोलिस उपनिरीक्षक ज्ञानोबा फड हे घटनास्थळावर पोहोचले. त्यांनी लगेच जखमी गोलूला मेडिकलमध्ये पोहोचवले. त्यांच्या सतर्कतेमुळे गोलूचा जीव वाचला. याप्रकरणी अजनी पोलिसांनी दिनेश आणि आकाशला अटक केली आहे.