शहिद नरेश बडोले अनंतात विलीन, शहिद बडोले यांच्यावर शासकीय इतमामात अंत्यसंस्कार

नागपूर : काश्मीर मध्ये तैनात असलेले केंद्रीय राखीव पोलीस दलाचे जवान नरेश बडोले काल दहशतवाद्यांनी केलेल्या गोळीबारात शाहिद झाले. मुळचे नागपूरचे असलेल्या शहिद बडोले यांच्यावर आज शासकीय इतमामात नागपुर जिल्ह्यातील हिंगणा तातुक्यात असलेल्या डिगडोह स्मशानभूमीत  अंत्यसंस्कार करण्यात आले. 

नक्की वाचा - त्यांना कळतो केवळ माणुसकीचा धर्म; ज्याच्या त्याच्या धर्मानुसार देतात अंतिम निरोप

काश्मीर मध्ये तैनात असताना काल त्यांच्यावर दहशतवाद्यांनी गोळीबार केला. यात ते जखमी झाले होते. त्यांना तात्काळ रुग्णालयात दाखल करण्यात आलं. मात्र, उपचारादारम्यान त्यांचा मृत्यु झाला. काल उशिरा रात्री त्यांचं पार्थिव नागपूरात आणण्यात आलं. 

शहिद बडोले यांना पत्नी आणि दोन मुली आहेत. नागपूरच्या हिंगणा परिसरातील पांडुरंग नगर येथे त्यांचे निवासस्थान आहे. आज सकाळी त्यांचे पार्थिव त्यांच्या निवासस्थानी आणल्यावर कुटूंबियांचा बांध सुटला. यावेळी राज्याचे गृहमंत्री अनिल देशमुख यांनी कुटुंबियांना भेट देऊन त्यांचं सांत्वन केलं आणि शाहिद बडोले यांना श्रद्धांजली अर्पण केली. 

अधिक माहितीसाठी - दोन्ही मुलींना होती बाबांची प्रतीक्षा, पण घडले धक्कादायकच!

फुलांनी सजविलेल्या रथात त्यांची अंत्ययात्रा स्मशानभूमीकडे रवाना झाली. यावेळी नागरिकांनी 'शहीद नरेश बडोले अमर रहे' च्या घोषणा दिल्या. त्यानंतर केंद्रीय राखीव पोलीस दल आणि महाराष्ट्र पोलिसांना हवेत तीन राऊंड फायर करत मानवंदना दिली. शहिद बडोले यांच्या दोन्ही मुलींनी त्यांना अग्नी दिला. तत्पूर्वी कुटुंबियांनी बुद्ध वंदना घेत त्यांना अखेरचा निरोप दिला 

संपादन - अथर्व महांकाळ