नागपूर : राज्यातील तापलेले राजकीय वातावरण आणि विरोधी पक्षनेत्यांनी घेतलेली आक्रमक भूमिका लक्षात घेता राज्याचे गृहमंत्री अनिल देशमुख आणि माजी मुख्यमंत्री देवेंद्र फडणवीस यांच्या नागपुरातील निवासस्थानाच्या सुरक्षेत मोठी वाढ करण्यात आली आहे. निवासस्थानासमोर मोठा पोलिस ताफा तैनात करण्यात आला आहे.
सूत्रांच्या माहितीनुसार, राज्याचे गृहमंत्री अनिल देशमुख यांच्यावर आरोप करीत पोलिस महासंचालक परमबीर सिंग यांनी ‘लेटरबॉम्ब’ टाकला आहे. सध्या हे प्रकरण राज्यात चांगलेच गाजत आहेत. विरोधी पक्षाला आयतीच संधी मिळाल्यामुळे देशमुख यांच्यावर आरोपांच्या फैरी झाडत आहेत. देशमुख यांनीसुद्धा विरोधी पक्षाला तोडीस तोड उत्तर देत किल्ला लढविला आहे.
विरोधी पक्षनेते देवेंद्र फडणवीस यांनी नागपुरात पत्रकार परिषद घेत अनिल देशमुख यांच्यावर सचिन वाझे प्रकरण आणि शंभर कोटींची वसुलीचे आरोप लावले आहेत. महाविकासआघाडीची सावध भूमिका आणि विरोधी पक्षाच्या आक्रमतेमुळे उपराजधानीतील वातावरण चांगलेच तापले आहे. भाजप पक्षाने रविवारी गृहमंत्री अनिल देशमुख यांच्याविरोधात आंदोलन केले होते तर राष्ट्रवादी कॉंग्रेसनेसुद्धा संविधान चौकात परमबीर सिंग विरोधात जोरदार आंदोलन केले.
उपराजधानीतील तापलेले वातावरण बघता खबरदारीचा उपाय म्हणून पोलिस आयुक्त अमितेश कुमार यांनी गृहमंत्री देशमुख आणि फडणवीस यांच्या निवासस्थानाच्या सुरक्षेत वाढ करण्याचे आदेश दिले. सीताबर्डी पोलिसांनी दोन्ही नेत्यांच्या घराजवळ बॅरिकेडिंग केली. घराकडे येणाऱ्या-जाणाऱ्या रस्त्यावरून जाणाऱ्यांची चौकशी करण्यात येत आहे. तसेच निवासस्थानाला छावणीचे स्वरूप आले आहेत.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.