दारू पिऊन शिवीगाळ करणाऱ्या भावाची काठीने वार करून हत्या

नागपूर : दारू पिऊन शिवीगाळ करणाऱ्या भावाची काठीने वार करून हत्या करण्यात आली. ही घटना काटोलपासून १० किमी अंतरावरील इसापूर खुर्द येथे घडली. रोशन नागोराव ठाकरे (वय २५) असे मृताचे नाव आहे. काटोल पोलिसांनी खुनाचा गुन्हा दाखल करून नितेश नागोराव ठाकरे (वय २३) याला अटक केली आहे.

पोलिसांनी दिलेल्या माहितीनुसार, १६ फेब्रुवारीला रात्री ८ वाजताच्या सुमारास नितेश हा जेवण करीत होता. रोशन हा दारू पिऊन आला. त्याने नितेश याला शिवीगाळ केली. संतप्त नितेश याने काठीने त्याला मारहाण केली. यात रोशन याचा मृत्यू झाला. काटोल पोलिसांनी आकस्मिक मृत्यूची नोंद करून तपास सुरू केला. तपासादरम्यान नितेश याने मारहाण केल्याने रोशनचा मृत्यू झाल्याचे समोर आले. पोलिसांनी खुनाचा गुन्हा दाखल करून नितेश याला अटक केली.

जाणून घ्या - कुटुंबीयांसोबतचे 'ते' जेवण ठरले अखेरचे, घराच्या दिशेने निघालेल्या 'बरखा'वर काळाचा घाला

युवकावर हल्ला

क्षुल्लक कारणावरून दोघांनी विकास सोनवाणे (वय २४) याच्यावर काठीने हल्ला केला. ही घटना शुक्रवारी दुपारी जाटतरोडी भागात घडली. याप्रकरणी इमामवाडा पोलिसांनी ऋतिक शंकर राठोड वय २० व अल्पवयीन साथदाराविरुद्ध गंभीर दुखापतीचा गुन्हा दाखल केला आहे.