नागपूर : जामीनावर कारागृहाबाहेर येताच चार जणांनी कुख्यात गुंड व साथीदारावर हल्ला केला. यात कुख्यात गुंडाचा मृत्यू झाला असून साथीदार पळून गेल्याने बचावला. हे थरारक हत्याकांड सोमवारी रात्री सात वाजताच्या सुमारात खामला ते जयताळा मार्गावरील लंडन स्ट्रीटच्या खुल्या भागात घडला. नीलेश राजेश नायडू (वय ३१, रा. खामला) असे खून झालेल्या युवकाचे नाव आहे. प्रतीक सहारे असे जखमीचे नाव आहे.
पोलिसांनी दिलेल्या माहितीनुसार, कुख्यात नीलेशविरुद्ध यापूर्वीचे लुटमार, खून, खुनाचा प्रयत्न आदी स्वरुपाचे गंभीर गुन्हे दाखल आहेत. त्यामुळे तो कारागृहात होता. तीन दिवसांपूर्वीच शुक्रवारी तो जामिनावर कारागृहाबाहेर आला. सोमवारी सायंकाळी ७ वाजताच्या सुमारास तो लंडन स्ट्रीटच्या बाजूला आलेल्या मैदानात मित्र प्रतीकसह दारू पित बसला होता.
त्यावेळी चार युवत तेथे आले. त्यांच्याकडे चाकू व रॉड होता. दोघांनाही त्यांनी घेरले. दोघांवरही त्यांनी हल्ला केला. त्यावेळी प्रतीकच्या पायावर चाकू लागला. पण, तो लंगडत पळून गेला. आरोपींच्या हाती नीलेश लागला. नीलेशला घेरले व त्याच्यावर शस्त्रांनी वार केले. त्यानंतर दगडाने ठेचले. प्रतीक हा मदतीसाठी रस्त्यावर आला. त्याने पोलिसांना माहिती दिली.
सोनेगाव पोलिस घटनास्थळी पोहोचेपर्यंत आरोपी पळून गेले होते. मारेकरी कोण आहे, हे स्पष्ट झाले नाही. पण, गुन्हेगारी व वर्चस्वाच्या वादातूनच त्याचा खून करण्यात आला असावा, अशी शक्यता पोलिस वर्तुळातून व्यक्त करण्यात येत आहे. आरोपींबाबत अद्याप कोणताही सुगावा लागला नाही.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.