मृत्यूच्या दारात असतानाही 'त्याने' दिले तिघांना जीवदान, १९ वर्षीय मुलीचा पुढाकार

नागपूर : दक्षिणपूर्व मध्य रेल्वेत कार्यरत नरेश मेश्राम (४६) यांनी मंगळवारी (ता.५) मृत्यूला जवळ करताना यकृत आणि किडनी दान करीत तिघांना जीवनदान दिले. तर नेत्रदानातून दोघांच्या नजरेत उजेड पेरला. विशेष असे की, मेश्राम यांच्या १९ वर्षीय मुलीने अवयवदान करण्याचा निर्णय घेत समाजापुढे एक नवा आदर्श निर्माण केला आहे. 

हेही वाचा - 'त्या' चौघांचे मृतदेह बघून आई-वडिलांनी फोडला टाहो; हिवरा-हिवरीत शोककळा;...

नरेश प्रेमलाल मेश्राम मूळचा गोंदिया जिल्ह्यातील मरार टोली येथील. ३० डिसेंबरला त्यांचा अपघात झाला. त्यांना रेल्वे रुग्णालयात दाखल केले. पुढे ३ जानेवारीला केअर हॉस्पिटलमध्ये हलविण्यात आले. मात्र, उपचाराला प्रतिसाद मिळत नसल्याने दुसऱ्याच दिवशी (ता.४) मेंदूमृत असल्याचे कुटुंबाला कळविण्यात आले. दरम्यान, विणा वाठोरे, शुभांगी पोकले यांनी अवयवदानासाठी समुपदेशन केले. १९ वर्षीय मुलगी सुनिधी यांनी आई श्रीदेवी यांचे मत घेत अवयवदानाचा निर्णय घेतला. तातडीने ही माहिती विभागीय अवयव प्रत्यारोपण समन्वय समितीच्या अध्यक्ष डॉ. विभावरी दाणी आणि सचिव डॉ. संजय कोलते यांनी अवयवदानाची प्रतीक्षा यादीचा शोध घेण्यात आला. त्यात न्यू ईरात एक रुग्ण यकृताच्या प्रतीक्षेत असल्याचे स्पष्ट झाले. न्यू ईरा हॉस्पिटलमध्ये यकृत प्रत्यारोपणाच्या शस्त्रक्रियेतून एकाला जीवनदान मिळाले.

हेही वाचा - नवे महापौर दयाशंकर तिवारींपुढे आव्हानांचा डोंगर; पक्षाची ‘विकेट’ वाचविण्यासाठी लागणार कस

६० वर्षीय महिला सुपर स्पेशालिटीत, २५ वर्षीय तरुण केअर रुग्णालयात किडनीच्या प्रतीक्षेत होते. सुपरमधील महिला सुदृढ नसल्याने मेडिट्रिनातील ३७ वर्षीय महिलेला किडनी दान केली. यकृत प्रत्यारोपण तज्ज्ञ डॉ. राहुल सक्सेना, डॉ. साहील बंसल यांच्यासह मेडिट्रिनाचे किडनी प्रत्यारोपण तज्ज्ञ डॉ. शिवनारायण आचार्य, डॉ. अनघा कुलकर्णी, डॉ. रोहित गुप्ता, केअरमधील डॉ. अश्विनीकुमार खांडेकर, डॉ. रवी देशमुख, डॉ.एस. जे. आचार्य, डॉ. वेद यांनी किडनी प्रत्यारोपण केले. माधव नेत्रपेढीत नेत्रगोल दान करण्यात आले. यातून दोघांच्या डोळ्यांमध्ये प्रकाश पेरण्यात येणार असल्याची माहिती आहे. 

कोरोनामुळे वर्षभर अवयवदान झाले नाही. मात्र आता काही प्रमाणात अवयवदान होऊ लागले आहे. मेंदूमृत व्यक्तीच्या अवयवदानातून अवयवांच्या प्रतीक्षेत असलेल्या व्यक्तीला जीवनदान मिळू शकते. समाजाने अवयवदानासाठी पुढाकार घेतल्यास अनेकांचे प्राण वाचवण्यात यश मिळते. 
-डॉ. आनंद संचेती, हृदय प्रत्यारोपण तज्ज्ञ, नागपूर.