मित्राची धडपड सुरूच होती, पण नियती कठोर झाली; उपचारापूर्वीच मित्राने मित्राच्या पाठीवर सोडले प्राण

नागपूर : वय अवघे ४० वर्ष... कुटुंबातील कर्ता व्यक्ती... घरात पत्नी व एक लहान मुलगी... पेंटिंगचे काम करून कुटुंबाचा गाडा हाकायचा... कामावर असतानाच अचानक छातीत दुखायला लागले... परिस्थितीचे गांभीर्य ओळखून मित्राने त्याला दुचाकीवर बसवून दवाखान्यात नेण्याची धडपड चालवली... मित्राला काही होऊ द्यायचे नाही, यासाठी प्रयत्नही खूप केले... पण, नियती कठोर झाली... रस्त्यात एक दवाखाना दिसला, पण तोही बंद होता... अखेर त्याने दुचाकीवर बसून जात असतानाच मित्राच्या पाठीवर मान टाकली अन् अखेरचा श्वास घेतला...

मित्राने पाठीवर मान टाकल्यानंतरही त्याला कसेबसे सावरत सहकारी मित्र त्याला मेडिकलमध्ये घेऊन गेला. तोपर्यंत आपला मित्र आता या जगात नसल्याची त्याला कल्पना नव्हती. त्यामुळे मित्राला वाचविण्याची त्याची धडपड सुरूच होती. शेवटी मेडिकलमध्ये पोहोचल्यावर डॉक्टरांनी त्याला मृत घोषित केले. अमलेश चरणदास मेश्राम (वय ४०, रा. कृष्णधाम, मानकापूर, नागपूर) असे मृत पेंटरचे नाव आहे.

अधिक वाचा - ‘मुलांनो, आम्हाला माफ करा; आमचे मृतदेह मेडिकल कॉलेजला दान करा’ अशी चिठ्ठी लिहून दाम्पत्याची आत्महत्या

गेल्या काही दिवसांपासून अमलेश मेश्राम हे त्याचा एक सहकारी ज्ञानेश्वर देवराव गेडाम यांच्यासोबत पृथ्वीधामनगर, बेलतरोडी येथील देशमुख यांच्या घरी पेंटिंगचे काम करीत होते. ११ फेब्रुवारी रोजी दुपारी ३ वाजताच्या सुमारास अचानक मेश्राम यांच्या छातीत दुखू लागले. त्यांनी हे घरमालक देशमुख यांना सांगितले. त्यांनी मेश्राम यांना घरात बोलावून चहा दिला आणि थोडावेळ आराम करण्यास सांगितले.

पण, मेश्राम यांना काही बरे वाटत नसल्याचे सहकारी गेडाम यांना सांगितले. त्यांनी लगेच दुचाकी काढली आणि मेश्राम यांना मागे बसवून दवाखान्यात नेण्यासाठी धडपड सुरू केली. बेलतरोडी रोडवर त्यांना डॉ. पराग जोशी यांचे हॉस्पिटल दिसले, पण बंद असल्याने ते मेडिकलमध्ये जाण्यासाठी निघाले. मेश्राम यांना आधाराने दुचाकीवर बसविले.

थोडे अंतर जात नाही तोच मेश्राम यांनी दुचाकी चालविणाऱ्या गेडाम यांच्या पाठीवर मान टाकली. त्यांचा मृत्यू झाला होता. पण, मित्र हिंमत हारला नव्हता. दुचाकी चालवित तो त्यांना धीर देत होता. अखेर तो त्यांना कसाबसा मेडिकलमध्ये घेऊन गेला. पण, डॉक्टरांनी मेश्राम यांना मृत घोषित केले.

जाणून घ्या - जेवणासाठी बाहेर गेलेल्या मुलाची २८ दिवासांनी फक्त मिळाली कवटी; टी-शर्ट बघताच आईने फोडला हंबरडा

मेश्राम यांना पत्नी आणि एक मुलगी आहे. याप्रकरणी फिर्यादी ज्ञानेश्वर देवराव गेडाम (वय ५२, रा. हिलटॉप, सुदामनगरी, नागपूर) यांनी दिलेल्या सूचनेवरून बेलतरोडी पोलिसांनी अकस्मात मृत्यूची नोंद केली आहे.