दोन्ही मुले ढसा ढसा रडत म्हणाले, ‘मम्मीऽऽ मम्मी पप्पाला काय झालं, ते कधी येणार’

टाकळघाट (जि. नागपूर) : नागपूरवरून यवतमाळला जाणाऱ्या एसटीने दुचाकीला जोरदार धडक दिली. यात दुचाकी चालकाचा जागीच मृत्यू झाला. ही घटना बुटीबोरी पोलिस ठाण्याच्या हद्दीत वर्धा रोडवरील आसोला सावंगी जवळ बुधवारी सायंकाळी पाच-सहा वाजताच्या सुमारास घडली. सतीश मेघश्याम नवघरे (३५, रा. टाकळघाट) असे मृताचे तर मदन नामाजी राऊत असे आरोपी एसटी चालकाचे नाव आहे.

पोलिसांनी दिलेल्या माहितीनुसार, सतीशचे टाकळघाट येथे हार्डवेअरचे दुकान आहे. दुकानाच्या काही कामासाठी तो आसोला सावंगीकडे दुचाकी क्र. एमएच ४० एएफ ५४१३ने जात होता. मागून येणाऱ्या नागपूर-यवतमाळ एसटी क्र. एमएच ४० एक्यू ६४४३ने सतीशच्या दुचाकीला मागून जबर धडक दिली. यात सतीशच्या डोक्याला मार लागल्याने त्याचा जागीच मृत्यू झाला. आजूबाजूच्या नागरिकांनी घटनास्थळी धाव घेऊन बघितले असता सतीशचा मृत्यू झाला होता.

जाणून घ्या - हृदयद्रावक...रात्री सव्वा अकरा वाजता मायलेकींनी रेल्वे रुळावर झोपून संपविली जीवनयात्रा

अपघाताची माहिती मिळताच बुटीबोरी पोलिसांनी घटनास्थळ गाठले. पंचनामा करून मृतदेह ताब्यात घेत शवविच्छेदनासाठी मेडिकल नागपूर येथे रवाना केला. त्यानंतर लगेच तपासाची चक्र फिरवित बस ताब्यात घेऊन बस चालकावर गुन्हा नोंद करून अटक केली. पुढील तपास सुरू आहे. एक महिनाअगोदरसुद्धा महाराष्ट्र राज्य मार्ग परिवहन मंडळाच्या बस चालकाचे नियंत्रण सुटल्याने दुचाकी चालकास धडक दिल्याने मृत्यू झाला होता, हे विशेष...

दुसऱ्या घटनेत टाकळघाटमधील दुचाकी चालकास मागून एसटी चालकाने धडक दिल्याने सतीश रक्ताच्या थारोळ्यात पडला व जागीच मृत झाला. दोन्ही घटना एका महिन्याच्या कालावधीत घडल्या. हे अपघात एसटी महामंडळाच्या चालकाच्या निष्कळजीपणामुळे घडल्याने प्रशासनाने गांभीर्याने लक्ष देण्याची गरज आहे.

हेही वाचा - व्हॉट्सॲप ग्रुपवर कमेंट करणे जीवावर बेतले; घरात घुसून युवकाचा खून

सतीश हा मनमिळावू स्वभावाचा

सतीश हा मनमिळावू स्वभावाचा होता. तो सर्वांशी मिळून राहायचा. त्याने कधीच कोणाचे मन दुखावण्याचा प्रयत्न केला नाही. दुकानाच्या काही कामानिमित्त बाहेर पडला असता वर्धा रोडवरील आसोला सावंगी नजीक एसटीने मागून धडक दिल्याने त्याचा मृत्यू झाला. सतीशचा अपघात झाल्याची माहिती मिळताच पत्नी, मुलगा, मुलगी, आई, वडील आदींनी हंबरडा फोडला. सतीशचा मुलगा पाच वर्षांचा तर मुलगी आठ वर्षांची आहे. ‘मम्मी पप्पाला काय झालं, ते कधी येणार’ असे प्रश्न दोन्ही चिमुकले ढसा ढसा रडताना करू लागले. मृत सतीशचा परिवार मोठा असल्याने आप्त शोक सागरात बुडाले आहेत.

संपादन - नीलेश डाखोरे