शाळेत विद्यार्थी येतील का? अठ्ठेचाळीस शाळा होणार २६ नोव्हेंबरपासून सुरू; चार शिक्षक पॉझिटिव्ह

जलालखेडा (जि. नागपूर) : नरखेड तालुक्यातील नववी ते बारावीचे वर्ग सोमवारपासून (ता. २३) सुरू होणार होते. परंतु, जिल्हाधिकारी यांनी २६ नोव्हेंबरपासून शाळा सुरू करण्याचा निर्णय घेतल्यामुळे सोमवारी शाळेची घंटा वाजली नाही. २६ नोव्हेंबरला शाळेची घंटा वाजली तर विद्यार्थी शाळेत येतील का, हा प्रश्न आहे.

नरखेड तालुक्यात नववी ते बारावी पर्यांतच्या ४८ शाळा आहेत. ६,९२० विद्यार्थी असून या शाळांमध्ये ३३५ शिक्षक व १६२ शिक्षकेत्तर कर्मचारी कार्यरत आहे. आजपर्यंत ३२३ शिक्षकांची आरटीपीसीआर कोविड प्राथमिक चाचणी पूर्ण झाली आहे. प्राप्त अहवालानुसार चार शिक्षक पॉझिाटिव्ह आढळले. अद्याप ही १२ शिक्षकांनी चाचणी केली नसून काही शिक्षकांचा अहवाल प्राप्त व्हायचा आहे.

जाणून घ्या - वाघाचा मागोवा घेण्यासाठी वनविभागाचे पथक जंगलात घालत होते गस्त; समोरचे दृष्य पाहताच बसला धक्का

शाळांमध्ये उपस्थित राहण्यासंदर्भात २,०७६ पालकांनी संमतीपत्रक दिले असल्याची माहिती नरखेड येथील शिक्षण विभागाकडून देण्यात आली आहे. कोरोनासंदर्भात करावयाच्या उपाययोजनाअंतर्गत सर्व शाळांना पल्सऑक्सिमिटर, सॅनिटायझर, सोडिअम हायपोक्लोराईड सोलुशन आदी आवश्यकतेनुसार उपलब्ध करून देण्यात आले आहे.

विद्यार्थ्यांच्या कुटुंबात कुणालाही कोरोनाचे लक्षण नाही याची माहिती घेण्यात आली. तसेच विद्यार्थ्यांना कुटुंब माहितीपुस्तिका देण्यात येणार आहे. शिक्षक व शिक्षकेत्तर कर्मचारी यांना कोरोनासदृश लक्षणे असल्यास त्यांची तत्काळ आरटीपीसीआर टेस्ट करण्यात येणार आहे. यासाठी मुख्याध्यापकांना दररोज केंद्रप्रमुखांना अहवाल सादर करावयाचा असल्याचेही नरखेडचे तहसीलदार डी. जी. जाधव यांनी सांगितले.

सविस्तर वाचा - अफलातून; शिक्षक उमेदवारानी लावली शर्ट बनियानवर लग्नसंमारंभात हजेरी

शाळा सुरू करताना सामूहिक प्रार्थना होणार नाही. तसेच प्रत्येक वर्गाचे वेळापत्रक वेगवेगळे राहणार आहे. सकाळी १० पासून शाळा सुरू होतील. शाळेचा कालावधी ३ ते ४ तास राहील. यात विद्यार्थी एकत्र येणार नाही.

सामाजिक अंतर तसेच मास्क आवश्यक असणार आहे. शासनाच्या सर्व सूचनांचे तंतोतंत पालन करावे लागणार आहे. शासन सर्व खबरदारी घेऊन शाळा सुरु करीत असले तरी पालक खरच आपल्या पाल्यांना शाळेत पाठवणार की नाही, हे २६ नोव्हेंबरलाच कळणार आहे.

संपादन - नीलेश डाखोरे