जादूटोण्यावरून मारहाण प्रकरण : आणखी दहा जणांना अटक, गावात पोलिसांचा तगडा बंदोबस्त

जिवती (जि. चंद्रपूर) : जिवती तालुक्यातील वणी (खुर्द) गावात जादूटोण्याच्या संशयावरून गावातील (chandrapur superstition case) लोकांनी वृद्ध महिला आणि पुरुषाला चौकात बांधून मारहाण केल्याची धक्कादायक घटना घडली. जखमी वृद्ध महिला व पुरुषांवर जिल्हा सामान्य रुग्णालयात उपचार सुरू आहेत. याप्रकरणी आतापर्यंत पोलिसांनी २३ जणांना अटक केली. त्यापैकी १३ जणांना सोमवारला न्यायालयात हजर करण्यात आले. त्यातील ९ जणांची जामिनावर सुटका झाली. चार जणांना एक दिवसाची पोलिस कोठडी सुनावण्यात आली.

तपासात आणखी आरोपींची नावे समोर येण्याची शक्यता आहे. जिवतीचे सहाय्यक पोलिस निरीक्षक संतोष अंबिके यांनी पोलिसांचे पथक तयार केले. या पथकाने रात्री दहा जणांना ताब्यात घेतले. दत्ता धोंडीराम तेलंगे (३५), भागवत गोपाळ शिंदे(३४), विठ्ठल किशन पांचाळ(३७), वैजनाथ संभाजी शिंदे(५५), विठ्ठल जगन्नाथ शिंदे(३५), किरण चंद्रमणी कराळे(२५),साहेबराव सटवाजी पौळ(३५), मनोहर परशुराम भिसे (४५), केशव श्रीहरी कांबळे (३०), दिनेश अंकुशराव सोनकांबळे (२३) अशी अटकेतील आरोपींची नावे आहेत. गावात शांतता अबाधित राहावी यासाठी अंधश्रद्धा निर्मूलन समिती आणि पोलिसांच्या वतीने समुपदेशनाचे काम सुरू आहे. गावात पोलिसांचा मोठा फौजफाटा तैनात आहे. या क्षेत्राचे आमदार सुभाष धोटे यांना गावाला भेट देऊन पीडित कुटुंबीयांशी चर्चा केली.

अटकेच्या भीतीने पलायन

जादूटोण्याच्या कारणावरून मारहाण करणाऱ्यांचे अटकसत्र पोलिसांना सुरू केले आहे. आतापर्यंत 23 जणांना अटक झाली. यात प्रकरणात आणखी काही आरोपी आहे. अटकेच्या भितीने त्यांनी गाव सोडले आहे. ते लगतच्या जंगलात लपून असल्याचे गावकऱ्यांचे म्हणणे आहे. त्यांच्या अटकेसाठी पोलिसांनी विशेष पथक तयार केली आहे.