चिंचोली, विटाळा वाळूघाटावर 25 बोटी जप्त; एनडीआरएफ आणि महसूल विभागाची कारवाई

धामणगावरेल्वे (जि. अमरावती) ः तालुक्‍यातील वर्धा नदीच्या चिंचोली येथील वाळूघाटावर महसूल विभागाने वाळूचोरी थांबविण्यासाठी छापा टाकला. या वेळी वाळू उपस्यासाठी उपयोगात आणणाऱ्या 25 बोटी आदी मुद्देमाल सोडून वाळूचोर पळून गेले. 

जप्त केलेल्या बोटी जेसीपीच्या साहाय्याने नष्ट करण्यात आल्या. अमरावती येथील जिल्हाधिकारी कार्यालय, एनआरएफच्या पथकाने उपविभागीय अधिकारी इब्राहीम चौधरी यांच्या नेतृत्वाखाली ही संयुक्त कारवाई मंगळवारला (ता. पाच) केली. या कारवाईमुळे वाळूचोरट्यांचे धाबे दणाणले आहे.

जाणून घ्या - 'त्या' चौघांचे मृतदेह बघून आई-वडिलांनी फोडला टाहो; हिवरा-हिवरी गावात पसरली शोककळा; सरपंचांनाही अनावर झाले अश्रू

तालुक्‍यातील चिंचोली व विटाळा येथील नदीपात्रावरील वाळूघाटात पाण्याखाली वाळू आहे. या वाळूचा अवैध उपसा एका बोटीला 15 ड्रम लावून तयार करण्यात आलेल्या बोटीच्या माध्यमातून करण्यात येत होता. वर्धा नदीपात्रातून बोटीच्या साहाय्याने वाळूची चोरी सुरू असल्याची माहिती प्रशासनाला मिळाली होती. यामुळे अमरावती येथील जिल्हाधिकारी कार्यालय, एनआरएफच्या पथकाने उपविभागीय अधिकारी इब्राहीम चौधरी यांच्या नेतृत्वाखाली ही संयुक्त कारवाई केली. 

प्रथम विटाळा व त्यानंतर चिंचोली येथे कारवाई करण्यात आली. या वेळी परिविक्षाधीन तहसीलदार गौरव भळगटिया, मंडळ अधिकारी प्रकाश बोमनोटे, तलाठी विनोद जायेभाये आदी सहभागी झाले होते.

संपादन - अथर्व महांकाळ