खासगी बसची धडक अन् दहा फुट घासत गेला ऑटो; सात जण जखमी

अकोला : पातूर रोडवरील हिंगणा फाट्यानजीक प्रवाशांना घेऊन जाणाऱ्या एका ऑटोला पाठीमागून आलेल्या भरधाव खासगी बसने जबर धडक दिल्याची घटना गुरुवारी (ता.23) दुपारी दोन वाजताच्या सुमारास घडली. या अपघातात ऑटो मधील सात प्रवासी जखमी झाले असून, त्यांना उपचारासाठी सर्वोपचार रुग्णालयात हलविण्यात आले आहे.

महत्त्वाची बातमी - शेगाव पालखी मार्ग अर्धवट; ठेकेदाराने गुंडाळला गाशा

अकोला-पातूर रोडवरील हिंगणा फाट्यानजीक महालक्ष्मी ट्रान्सपोर्टच्या समोर प्रवासी घेऊन जात असलेल्या ऑटोला पाठीमागून आलेल्या खासगी बसने जोरदार धडक दिली. या भीषण अपघातात ऑटो 10 फूट घासत गेला. त्यानंतर ऑटो खाली रस्त्याच्या कडेला पडला. या भीषण अपघातात ऑटोतील 7 प्रवासी गंभीर जखमी झाले आहेत. 

क्लिक करा - काँक्रीट रस्ता फोडणे आले मुळावर; भोगावा लागणार तीन वर्षे कारावास

जखमींवर उपचार; चालकाविरुद्ध गुन्हा
परीसरातील नागरिकांनी जखमींना तातडीने रुग्णालयात उपचारासाठी दाखल करण्यात आले. या प्रवाशांची प्रकृती धोक्याबाहेर आहे. या अपघाताची माहिती मिळताच जुने शहर पोलिसांनी तातडीने घटनास्थळी धाव घेतली. पंचनामा केला असून, खासगी बसच्या चालकाविरुद्ध गुन्हा दाखल करण्याची प्रक्रिया सुरू केली.

अपघातात हे झाले जखमी
या दुर्घटनेत निंबी येथील रहिवासी कल्पना मनोहर इंगोले, आयुष मनोहर इंगोले, मंजू देशमुख, पुरुषोत्तम तुकाराम इंगोले, लक्ष्मी लहू अबगढ, अश्विनी नेवाने, कविता चौधरी, कमल नेवारे हे गंभीर जखमी झाले. जखमींना स्थानिक नागरिकांनी रुग्णालयात भरती केले असून, जखमींवर उपचार सुरू आहेत.