सकाळी फिरायला गेलेल्या युवकांचा अपघाती मृत्यू; खरकाडा गावावर शोककळा

चंद्रपूर : जिल्ह्यातील ब्रह्मपुरी शहरालगत मॉर्निंग वॉकसाठी निघालेल्या दोन युवकांना अज्ञात वाहनाने चिरडल्याची घटना पुढे आली आहे. ब्रह्मपुरी-आरमोरी मुख्य महामार्गावर शुक्रवारी पहाटेच्या सुमारास ही घटना घडली. दोन्ही मृत युवक याच महामार्गावरील खरकाडा या गावचे रहिवासी आहेत.

पोलिसांनी दिलेल्या माहितीनुसार, खरकाडा गावचे युवक नेहमीप्रमाणे मुख्य महामार्गावर मॉर्निंग वॉकसाठी गेले होते. पहाटेच्या सुमारास रस्त्यावरून जात असताना अज्ञात वाहनाने मागून युवकांना जबर धडक दिली. यात दोघांचाही घटनास्थळीच मृत्यू झाला. अपघाताची माहिती समजताच नागरिकांनी घटनास्थळाकडे धाव घेतली आणि पोलिसांना घटनेची माहिती दिली.

ठळक बातमी - मृत्यू झाल्यानंतर या धर्मात चक्क गिधाडांच्या स्वाधीन केला जातो मृतदेह; अनोख्या पद्धतीने करता अंत्यसंस्कार

ब्रह्मपुरी पोलिसांनी घटनास्थळ गाठत दोन्ही मृतदेह ब्रह्मपुरी उपजिल्हा रुग्णालयात शवविच्छेनासाठी पाठवले. चालक वाहनासह घटनास्थळावरून फरार झाल्याने अज्ञात वाहनाचा शोध ब्रह्मपुरी पोलिस घेत आहेत. एकाच दिवशी खरकाडा गावातील दोन युवकांचे अपघाती निधन झाल्याने परिसरातील नागरिकांना शोकाकुल करून गेले आहे.

संपादन - नीलेश डाखोरे