सावधान! ऑनलाइन शस्त्र खरेदी केल्यास होणार कारवाई

अमरावती : ई-कॉमर्स प्लॅटफॉर्मच्या माध्यमाने धारदार शस्त्रे विकली जातात. ती गुन्ह्यातसुद्धा वापरली जाण्याची भीती वाढली आहे. अशी शस्त्रे ऑनलाइन साइटवरून खरेदी केल्याची बाब पुढे आल्याने अशाप्रकारची शस्त्रे खरेदीवर पोलिस आयुक्त डॉ. आरती सिंह यांनी तीव्र नाराजी व्यक्त करून त्यावर प्रतिबंध करण्यासाठी बुधवारी (ता. 16) एक आदेश पारित केला. 

हेही वाचा - मास्क ठरतोय 'ऑलराऊंडर'; नियमित वापरामुळे...

या आदेशान्वये सदर कंपन्यांच्या माध्यमातून तीक्ष्ण असलेले प्राणघातक शस्त्र ज्याच्या पात्याची लांबी नऊ इंचापेक्षा जास्त किंवा ज्याची रुंदी दोन इंचापेक्षा जास्त आहे ते बाळगणे हे भारतीय हत्यार कायद्याच्या कमल 4 सहकलम 25 अन्वये दखलपात्र गुन्हा आहे. अशा शस्त्रविक्रीवर शहरात बंदी घालण्यात आलेली आहे.

हेही वाचा - उमेदवारांनो, ग्रामपंचायत निवडणुकीत करता येणार नाही पैशांची उधळपट्टी

शस्त्रे बाळगता ज्यांची लांबी नऊ इंचापेक्षा कमी व रुंदी दोन इंचापेक्षा कमी असलेल्या शस्त्राची ऑनलाइन खरेदी करणाऱ्या अमरावती शहरातील ग्राहकांची तपशीलासह माहिती शहर पोलिसांना वेळोवेळी पुरविण्याबाबत आदेश देण्यात आले. हा आदेश दहाही ठाण्यांच्या हद्दीकरिता लागू आहे. अशाप्रकारची ऑनलाइन शस्त्रे विक्री करणाऱ्या कंपन्यांना नोटीस बजावण्यात आल्याचे पोलिस आयुक्तांनी सांगितले.