तिवसा (जि. अमरावती) : तालुक्यातील शिरजगाव मोझरी येथील तुरकाने यांच्या घरी घरगुती कार्यक्रम सुरू होता. अचानक घरी असलेल्या सिलेंडरने पेट घेऊन आग पकडली. त्यामुळे सिलेंडर विझवण्यासाठी उपस्थित नागरिकांनी धावपळ केली. मात्र, अचानक पेट घेतलेल्या सिलेंडरमुळे काही वेळ चांगली तारांबळ उडाली होती.
गावातील तुरकाने यांच्या घरी तेरवीचा कार्यक्रम असल्याने स्वयंपाक करण्यासाठी लावलेल्या गॅस सिलेंडरने पेट घेतला. त्यामुळे सर्वांची सिलेंडर विझवण्यासाठी पळापळ सुरू झाली. उपस्थित नागरिकांनी यावेळी सतर्कता बाळगत पाणी व ओले कापडे सिलेंडरवर टाकले. मात्र, तरीही आग विझत नसल्याने पंचशील मंडळाच्या तरुणांनी व गावातील मंडळीनी जीव धोक्यात घालून गॅस सिलेंडर उचलून जवळील विहिरीत टाकला. त्यामुळे होणारी जीवितहाणी टळली.
सिलेंडर पेटत असल्याची माहिती तिवसा नगरपंचायतला मिळताच तातडीने मुख्याधिकारी डॉ. पल्लवी सोटे यांच्या मार्गदर्शनाखाली तिवसा न. प.चे कर्मचारी सूरज शापामोहन, सचिन देशमुख, निखिल वानखडे यांनी विहिरीतील सिलेंडर बाहेर काढले. मात्र, तोपर्यंत उपस्थित नागरिकांनी पेटत असलेल्या सिलेंडरवर नियंत्रण केले होते.
शुक्रवारी सकाळी गॅस एजन्सीकडून सिलेंडर घरी आणताच स्वयंपाकासाठी लावण्यात आले. मात्र, अचानक पेट घेतल्याने सर्वांनी जीव मुठीत घेत धावपळ सुरू केली. तिवसा नगरपंचायतचे अग्निशामक वाहन दाखल होताच विहिरीतून सिलेंडर बाहेर काढले तेव्हा त्याला वाईसार नसल्याची बाब समोर आली. यामुळे गॅस एजन्सीकडून लापरवाही झाल्याचे तुरकाने यांनी म्हटले.
संपादन - नीलेश डाखोरे
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.