Nitin Gadkari : ‘मिहान’मध्ये होणार राफेल विमानांची निर्मिती

अमरावती - भारत आज सर्वच क्षेत्रात आत्मनिर्भर बनला असून नागपुरातील मिहानमध्ये जगातील सर्वाधिक शक्तिशाली म्हणून ओळख असलेल्या राफेल विमानांची निर्मिती केली जाणार आहे, अशी माहिती केंद्रीय मंत्री नितीन गडकरी यांनी आज (ता.२८) अमरावती येथे दिली.

शासकीय ज्ञान विदर्भ संस्थेच्या शताब्दी महोत्सवाच्या समारोपीय कार्यक्रमात ते बोलत होते. संगीतसूर्य केशवराव भोसले सभागृहात आयोजित या कार्यक्रमाला खासदार डॉ. अनिल बोंडे, आमदार प्रवीण पोटे, संस्थेच्या संचालिका डॉ. अंजली देशमुख यांच्यासह मान्यवर उपस्थित होते.

श्री. गडकरी म्हणाले, विदर्भाचा चेहरा मोहरा बदलणाऱ्या मिहान प्रकल्पामध्ये आज देशातील तसेच आंतरराष्ट्रीय स्तरावरील अनेक नामांकित कंपन्या सुरू झाल्या असून त्या माध्यमातून हजारो हातांना काम मिळाले आहे. बोइंग, एअरबस सारख्या हेवीवेट कंपन्यासुद्धा याठिकाणी आहेत. भविष्यात लाखो बेरोजगार तरुणांना रोजगार मिळावा हा आमचा संकल्प आहे.

विदर्भात कापसावर आधारित प्रक्रिया उद्योग तसेच कापूस निर्यातीला भरपूर वाव आहे. बांगलादेश हा कापसाचा मोठा खरेदीदार देश आहे, कारण बांगलादेशात कापूस होत नसल्याने विदर्भातून निर्यात होणाऱ्या कापसाला चांगला भाव मिळतो आहे.

ही गरज ओळखून सिंदी येथून हल्दिया येथे कंटेनरव्दारे कापूस निर्यातीची सोय करण्यात आली आहे. येथून नदीमार्गाने तो बांगलादेशात पोचविण्यात येणार असल्याचे त्यांनी सांगितले.

प्रधानमंत्री नरेंद्र मोदी यांनी नवीन शैक्षणिक धोरण आणले असून ते लवचिक आहे. यामुळे विद्यार्थ्यांना त्यांच्या आवडीच्या क्षेत्रात शिकता येईल. भारतीय भाषांमध्ये वैद्यकीय, अभियांत्रिकी शिक्षण घेता येणार आहे.

जगात भारताची अर्थव्यवस्था आज पाचव्या क्रमांकाची मोठी अर्थव्यवस्था आहे. जागतिकीकरणाच्या युगात रोजगार व स्वयंरोजगार मिळवून देण्यासाठी नवीन अभ्यासक्रमांची सुरवात करण्यात येत असल्याचे श्री. गडकरी म्हणाले.