Amravati ZP : ब्लॅकलिस्टेट एजन्सीला ‘रेडकार्पेट’; भरारी पथकाच्या वाहन निविदेवर प्रश्नचिन्ह

अमरावती : जिल्हापरिषदेच्या आरोग्य विभागाकडून दरवर्षी भरारी पथकाकरिता वाहनांची व्यवस्था केली जाते, यंदाच्या भरारी पथकाच्या वाहन निविदेत गौडबंगाल झाल्याची बाब समोर आली आहे. आरोग्य विभागाने यापूर्वी सदोष कार्यप्रणालीचा ठपका ठेवून काळ्या यादीत टाकलेल्या एजन्सीलाच पुन्हा भरारी पथकातील वाहने पुरविण्याचा कंत्राट दिला. त्यामुळे आरोग्य विभागातील अधिकाऱ्यांच्या कार्यप्रणालीबाबत संशय व्यक्त होत आहे.

आरोग्य विभागाकडून मेळघाटातील धारणी व चिखलदरा येथील भरारी पथकातील वैद्यकीय अधिकाऱ्यांना दैनंदिन दौरा तसेच रुग्णांना रेफर करण्यासाठी भाडे तत्त्वावर वाहने घेतली जातात. त्यासाठी निविदा प्रक्रिया राबविली जाते.

त्याअनुशंगाने गतवर्षी निविदा प्रक्रिया राबविण्यात आली, मात्र कमी दराने वाहने लावणे परवडत नसल्याने अनेकांनी निविदा प्रक्रियेतून काढता पाय घेतला, मात्र याचाच फायदा घेत सर्वाधिक तक्रारी असलेल्या वाहन पुरवठादाराने वाहेन लावण्यासाठी संमती दिली. विशेष म्हणजे मागील पाच ते सहा वर्षांपासून एकाच पुरवठादाराकडे ही जबाबदारी देण्यात आली आहे.

संबंधित एजन्सीला आरोग्य विभागानेच काळ्या यादीत टाकले होते, मात्र संबंधित एजन्सीला पुन्हा आरोग्य विभागानेच सकारात्मक शेरा देत पुनश्च वाहन पुरवठादार म्हणून निवडले आहे. निविदा प्रक्रियेत दिलेल्या सूचनांचे पालन यापूर्वी एजन्सीकडून झाले नव्हते.

ऑर्डरमध्ये नमूद वाहनांऐवजी जुनी वाहने भाडेतत्त्वावर देण्यात यावेत, अशा तक्रारी यापूर्वी झालेल्या आहेत. नवीन ऐवजी जुने भंगार वाहन देवून रुग्ण तसेच वैद्यकीय अधिकाऱ्यांच्या जिवाशी हा एकप्रकारे खेळच सुरू असल्याची चर्चा जिल्हापरिषदेत सुरू आहे.

मुख्य कार्यपालन अधिकाऱ्यांच्या निर्णयाकडे लक्ष

भरारी पथकातील वाहन कंत्राटासंदर्भातील अनियमितता पाहता मुख्य कार्यकारी अधिकाऱ्यांकडून चौकशी गरजेची आहे. या प्रकरणी चौकशी करून संबंधित कंत्राट रद्द करण्याची मागणी होत आहे.

वाहनांची सेवाही ‘भंगार’

भरारी पथकातील भाडेतत्त्वावरील वाहनेच केवळ भंगार असतात असे नाही तर आतापर्यंतच्या पुरवठादारांची सेवासुद्धा ‘भंगार’असल्याचे मेळघाटातील वैद्यकीय अधिकारी सांगतात. अनेकदा तर डिझेलचे कारण दाखवून वाहने जागीच उभी ठेवली जातात, तर अनेक वाहनांचे टायर्स सुद्धा बदलविण्यात येत नाहीत.