Bribe : लाचप्रकरणात तलाठ्यासह भाचाही अटकेत! दीड लाख स्वीकारताना रंगेहाथ पकडले

अमरावती : शेतकऱ्याच्या नावाने कुळ खरेदीनंतर त्याची फेरफार घेण्यासाठी तलाठ्याने ३ लाख रुपयांची डिमांड केली होती. त्यापैकी दीड लाख रुपयांचा लाचेचा टप्पा स्वीकारला. त्यात तलाठी असलेल्या मामासह रक्कम घेण्यासाठी पाठविलेला त्याचा भाचाही अडकला.

अमरावतीच्या लाचलुचपत प्रतिबंधक विभागाने आशियाड चौक, विनायक मार्ट समोर, गुरुवारी (ता. ११) रात्री हा सापळा रचला होता. श्रावण विश्रामजी गाडे (वय ५७,रा. धानोरा कोकाटे, जि.अमरावती) असे तलाठ्याचे नाव असून, आनंद संजय इंगळे (वय २६, मिलिंद कॉलनी, अमरावती) यालाही त्यात अटक झाली.

तक्रारकर्ता व्यक्ती हे सनराईज अ‍ॅण्ड डेव्हलपर्स अ‍ॅण्ड कन्स्ट्रक्शन कंपनीमध्ये अग्रीकेटर म्हणून काम पाहतात. धानोरा कोकाटे परिसरात भूमापन क्रमांक १५८ मधील तीन हेक्टर ३६ आर जमीन शरद भाऊराव डहाके व देविदास महादेव विखार यांच्यासोबत कंपनीने भाडेपट्टा पूर्व करार केला आहे.

त्या शेतीचे प्रकरण अमरावती तहसीलदार यांच्या आदेशाने शेतकऱ्यांच्या नावे कुळ खरेदी करून देण्यात आले असून, त्याचा फेरफार घेण्याकरिता धानोरा कोकाटे येथील तलाठी यांनी तक्रारकर्त्याला ३ लाख रुपयांची मागणी केली होती.

त्यासंदर्भात तक्रारकर्त्याने पैसे देण्यापूर्वी अमरावतीच्या लाचलुचपत प्रतिबंधक विभागाकडे तक्रार नोंदविली. तलाठी श्रावण गाडे यांनी फेरफार घेण्याकरिता लाचेची मागणी केल्याचे निष्पन्न झाले. त्यांनी लाचेची रक्कम घेण्यासाठी भाचा आनंद इंगळे याला पाठविले. त्याचवेळी एसीबीच्या पथकाने सापळा रचून आधी भाचा व नंतर तलाठी अशा दोघांना अटक केली. पोलिस निरीक्षक योगेशकुमार दंदे, अमोल कडू, विनोद कुंजाम, आशिष जांभोळे, शैलेश कडू, गोवर्धन नाईक यांच्या पथकाने ही कारवाई केली.