कुख्यात गुंडाच्या हत्येने हादरले तुमसर, व्यापाऱ्यांकडून करायचा हप्तावसुली 

तुमसर (जि. भंडारा) : येथील कुख्यात गुंडाचा निर्घृण खून करण्यात आल्याने तुमसर शहरात शनिवारी एकच खळबळ उडाली. विकास गिलोरकर उर्फ डुबली असे मृत गुंडाचे नाव आहे. त्याच्या हप्तावसुलीमुळे तुमसरवासी चांगलेच कंटाळले होते. त्याची अचानक हत्या झाल्याने विविध चर्चांना उधाण आले आहे. 

तुमसर शहर संपूर्ण विदर्भात गुन्हेगारीकरिता कुप्रसिद्ध शहर आहे. दर दोन महिन्यात येथे एखादा मोठा गुन्हा घडतच असतो. त्यामुळे संपूर्ण विदर्भात तुमसर शहर गुन्हेगारी साठी ओळखला जातो. 

शनिवारी सकाळी साडेअकरा वाजेच्या सुमारास गौतमनगर भागात अज्ञात व्यक्त ीने अनेक गुन्ह्यांमध्ये सहभागी असलेल्या विकासच्या गळ्याच्या तिक्ष्ण हत्याराने वार केले. हल्ला केल्यानंतर अज्ञात आरोपीने घटनास्थळावरून पळ काढला. भररस्त्यात विकास गंभीर जखमी अवस्थेत तडफडत होता. विकास गुंड प्रवृत्तीचा असल्याने कुणीही त्याच्या मदतीसाठी पुढे आले नाही. पोलिस घटनास्थळी दाखल झाल्यानंतर जखमी विकासला शासकीय रुग्णालयात नेण्यात आले. मात्र उपचारादरम्यान त्याचे निधन झाले. विकासच्या हत्येप्रकरणी बातमी लिहेपर्यंत कोणालाही अटक करण्यात आली नव्हती. 

- Video : स्वप्नात आले शंकरजी... म्हणाले शेतातल्या झाडातून निघेल हे...

खर्ऱ्याकरिता केला होता खून 
विकास उर्फ डुबली हा सराईत गुन्हेगार म्हणून ओळखला जात होता. त्याने यापूर्वी हत्येसारखा गंभीर घटना केल्या आहेत. बाजारात जाऊन कपडा व सराफा व्यापाऱ्यांना धमकावून हप्तावसुली करायचा. वर्षभरापूर्वी विकासने भरदिवसा एका कपडा व्यापाऱ्याला धमकावण्याचा प्रयत्न केला असता सर्व व्यापाऱ्यांनी मिळून त्याला चांगलाच चोप दिला होता. त्यानंतर त्याला पोलिसांच्या हवाली करण्यात आले होते. विशेष म्हणजे, विकासने एकदा तर खर्ऱ्याकरिता एकाचा दगडाने ठेचून खून केला होता.