‘त्यांनी’ आमदारकीचा राजीनामा द्यावा, अन्यथा ‘मी’ राजकीय संन्यास घेईन!  कोण म्हणाले पहा!

खामगाव (जि.बुलडाणा) ः राज्याचे गृहमंत्री अनील देशमुख २८ एप्रिल रोजी नागपूरवरुन मुंबई येथे जात असताना त्यांनी  खामगाव येथे कोरोना व्हायरस संदर्भात माहिती जाणून घेतली. तेथून ते मुंबईसाठी निघत असताना भाजपचे जिल्हाध्यक्ष तथा आमदार आकाश फुंडकर यांनी गृहमंत्री यांच्याकडे अवैध दारु विक्री होत असल्याबाबत निवेदन देऊन कारवाईची मागणी केली. मात्र, ही तक्रार खोटी निघाली तर फुंडकरांनी आमदारकीचा राजीनामा द्यावा अन्यथा मी राजकीय संन्यास घेईन, असे आव्हान काँग्रेसचे माजी आमदार दिलीपकुमार  सानंदा यांनी भाजपचे आमदार आकाश फुंडकरांना केले आहे.

हेही वाचा - महाराष्ट्र दिन : महाराष्ट्राला गडकिल्ल्यांचं लेणं, या पर्यटनस्थळांनी केलंंय समृध्द

दारु विक्रीबाबत आमदार ॲड. आकाश फुंडकरांनी गृहमंत्री यांना तक्रारींचे निवेदन दिल्यानंतर माजी आमदार दिलीपकुमार सानंदा यांनी त्यांना खुले आव्हान दिले आहे.
आमदार फुंडकर हे भाजपचे जिल्हाध्यक्ष असतांना त्यांनी गृहमंत्र्यांची भेट घेऊन कोरोना विषाणू संसर्गावर लावण्यात आलेल्या संचारबंदीत शिथीलता द्या, बुलडाणा जिल्हयातील क्वारंनटाईन असलेले पोलीस कर्मचारी यांना शासनाच्या वतीने मदत द्या, बेरोजगारांना मदत करा अशा समस्या मांडणे अपेक्षीत होते. परंतू, त्यांनी तसे न करता त्यांच्या चेल्या चपाटयांच्या दारु दुकानांवर राज्य उत्पादन शुल्क विभागाच्या वतीने कारवाई झाल्यामुळे त्यांनी अवैध दारु विक्रीबाबत वेळेची भान न ठेवता केलेली तक्रार ही  त्यांच्या बौध्दिक क्षमतेवर प्रश्नचिन्ह निर्माण करणारी आहे. त्यानंतर सानंदांनी उपविभागीय पोलीस अधिकारी प्रदिप पाटील यांना पत्र देऊन फुंडकरांनी दिलेल्या तक्रारीची निर्भिड व निसंकोचपणे चौकशी करा, पण चौकशीपुर्वी तक्रार खरी आहे याबाबत त्यांचे बयान किंवा आवश्यक वाटल्यास त्यांच्याकडून प्रतिज्ञालेख लिहून घ्या, अशी पत्रान्वये विनंती केली आहे.

हेही वाचा - सूर्योदय ते सूर्यास्त अन्नत्याग...

तर तक्रारी संदर्भात इलेक्ट्राॅनिक मिडीया व पत्रकारांना प्रतिक्रिया देतांना माजी आमदार राणा दिलीपकुमार सानंदा यांनी सांगितले की, फुंडकरांनी केलेली तक्रार  खोटी निघाली तर त्यांनी आमदारकीचा राजीनामा द्यावा अन्यथा मी राजकीय संन्यास घेईन, असेही सानंदांनी म्हटले आहे.