Farmer Kidney Selling : शेतकऱ्याने मागितली स्वत:ची किडनी विकण्याची परवानगी

बुल़डाणा - निसर्गाच्या लहरीपणामुळे शेती तोट्याचा व्यवसाय होत आहे. अशातच पलढग येथील अल्पभूधारक शेतकऱ्याने राज्यपालांना निवेदन देऊन स्वतःची किडनी विकण्याची परवानगी देण्याची मागणी केली आहे.

बुलडाणा तालुक्यातील पलढग (पोस्ट कोथळी) येथील गंगाधर बळीराम तायडे यांनी ही मागणी केली आहे. जेमतेम १ हेक्टर ६० आर शेत त्यांच्याकडे आहे. ज्ञानगंगा अभयारण्याला लागून शेत असल्याने वन्यप्राणी पिकांची नासाडी करतात. पिके वाचविण्यासाठी रात्रीचा दिवस करून राखण करावी लागते.

यातून वाचली तर कधी ओला तर कधी कोरडा दुष्काळ, कधी गारपीट तर कधी पिकांवर रोगराई ठरलेली. यातून हाती आलेल्या पिकांना कवडीमोल भाव मिळतो, अशी व्यथा त्यांनी सांगितली.यातून लागवडी खर्चाइतकेही उत्पन्न मिळत नाही. मग पीक कर्ज कसे फेडणार, असा त्यांनी सवाल केला.

पीक कर्ज अल्प असल्याने खासगी सावकाराकडून अव्वाच्या सव्वा व्याजाने पैसे घेऊन शेती केली. मात्र, काहीही पिकवा तोटा ठरलेला, अशी मागील चार वर्षांपासूनची स्थिती. बँक व सावकाराचे तगादे सुरूच असल्याने नेहमी अपमान सहन करावा लागतो. या दुष्टचक्रामुळे कर्जबाजारीपणात भर पडत चालली.

आत्महत्येचे विचार मनात येतात, पण मन धजावत नाही, असे त्यांनी सांगितले. आत्महत्या केली तर घरच्यांना सरकार पैसे देईल, पण मी एकमेव कर्ता पुरुष असल्याने घरचे उघड्यावर पडतील. लेकरांना बाप मिळणार नाही. त्यामुळे एकतर गांज्याची शेती करू द्या अथवा किडनी विकण्याची परवानगी द्या, अशी मागणी निवेदनाद्वारे केली आहे.