'आयएमए'चे धरणे आंदोलन; सरकारी निर्णयाचा निषेध, दखल न घेतल्यास पुन्हा लढा

यवतमाळ : आयुर्वेद हे प्राचीन भारतीय वैद्यकशास्त्र आहे व त्याचा अभिमान प्रत्येक भारतीयाला आहे. परंतु, आयुर्वेदात संशोधन न झाल्याने हे प्राचिनशास्त्र मागे पडले. शासनाने आयुर्वेदाला चालना देत त्याला कालानुरूप आणण्यास प्रोत्साहन देणे अपेक्षित आहे. सीसीआयएम व आयुष मंत्रालयाने 58 प्रकारच्या शस्त्रक्रिया आयुर्वेदिक चिकित्सकांना करण्यास परवानगी देण्याचे ठरविले आहे. याविरोधात मंगळवारी  इंडियन मेडिकल असोसिएशन व डेन्टल असोसिएशन यांच्यातर्फे येथील तिरंगा चौकात निषेध व्यक्त करीत जिल्हाधिकाऱ्यांना निवेदन देण्यात आले. 

हे ही वाचा : मरताना प्रद्युम्नने जोडली तीन राज्यांची नाळ, दिले सहा जणांना जीवदान 

आयुर्वेदाच्या प्राचीन वटवृक्षावर ऑलोपॅथिरूपी कलम छाटून लावणे हे आयुर्वेदाला खुजे करणे होय. त्यापेक्षा वेदात विशद केलेल्या व सुश्रुताने विकसित केलेल्या शल्यशास्त्रात संशोधन करून आयुर्वेदाची महती वाढवावी, अशी अपेक्षा आहे. मात्र, शासन व आयुष मंत्रालयाकडून तसे होताना दिसत नाही. शस्त्रक्रिया हा जीवन मरणाचा प्रश्न आहे. ती शिकायला एका सर्जनला साडेपाच वर्षे, त्यानंतर त्यातील स्पेशलायझेशन करायला आणखी तीन वर्षे व नंतर दोन ते तीन वर्षे ज्येष्ठतज्ज्ञांसोबत काम करून ती शस्त्रक्रिया तंत्र आत्मसात केली जाते. त्यात शासकीय बॉण्डचा कालावधी समाविष्ठ केल्यास तब्बल 15 वर्षे लागतात. याला समांतर असा पर्यायी अभ्यासक्रम आयुष मंत्रालयाला आयुर्वेदाचार्यसाठी आणल्यास तो स्वागतार्ह राहील. 

हे ही वाचा : चिंताजनक! कोरोनासोबतच डेंगीचाही वाढला धोका, दोन महिन्यात ७४ रुग्ण 

कोणतीही शस्त्रक्रिया आत्मसात करणे व ती करताना येणाऱ्या सर्व प्रकारचा जोखमी, गुंतागुंत याला संपूर्ण तंत्र पूर्ण प्रणाली लागते. याबद्दल सीसीआयएम किंवा आयुष मंत्रालयाकडून काहीही स्पष्टीकरण नाही. सामान्य माणसाला आयुष आयुर्वेदाचार्य व ऍलोपॅथिक सर्जन यातला फरक समजावणे आवश्‍यक असल्याची मागणी 'आयएमए'ची आहे. आयुर्वेदिक संशोधन व गुणवत्ता मूल्यांकनावर भर द्यावा, अशी मागणी डॉक्‍टरांची आहे. परंतु, असे शॉर्टकट काढून सरकारने सामान्य नागरिकांच्या जीविताशी खेळू नये, अशी अपेक्षाही निवेदनात केली.

शासनाने फेरविचार न केल्यास 11 डिसेंबरला राष्ट्रव्यापी कामबंद आंदोलनाचा इशारा आयएमए व आयडीएने निवासी जिल्हाधिकारी ललितकुमार वऱ्हाडे यांना दिलेल्या निवेदनात दिला आहे. निवेदन देताना 'आयएमए'चे अध्यक्ष डॉ. संजीव जोशी, सचिव डॉ. प्रशांत कसारे, डॉ. चेतन दरणे आदी पदाधिकारी उपस्थित होते.

संपादन - सुस्मिता वडतिले