श्वानांनी तोडले मृतदेहाचे लचके, नातेवाइकांनी ओळखले मृताचे कपडे

यवतमाळ : दारव्हा मार्गावरील जिल्हा परिषद पदाधिकाऱ्यांच्या बंगल्यामागील परिसरात मृतदेहाचा सांगाडा आढळून आल्याने खळबळ उडाली. ही घटना बुधवारी (ता.2) दुपारी उघडकीस आली. नातेवाइकांनी मृताचे कपडे ओळखले. मात्र, तो मृतदेह त्या व्यक्तीचा आहे की नाही, हे अजून स्पष्ट झाले नाही.

हेही वाचा - स्मार्ट प्रसाधनगृहाची योजना रखडली, २६ पैकी फक्त सहाचे...

अनोळखी व्यक्तीच्या मृतदेहाची कवटी पडून असल्याची माहिती यवतमाळ शहर पोलिसांना मिळाली. त्यावरून त्यांनी घटनास्थळ गाठले. श्‍वानपथकालाही लगेच पाचारण करण्यात आले. श्‍वानाने दारव्हा मार्गावरील एका लॉजच्या मागील बाजूस माग काढला. लॉजच्या मागील बाजूस झाडाला गळफास लावून व्यक्तीने आत्महत्या केली. मृतदेह कुजल्याने केवळ कपडेच शिल्लक होते, तर श्‍वानांनी मृतदेहाचे लचके तोडल्याचे दिसून आले. कपड्यावरून सदर मृतदेह सुनील दयाराम घनबहादूर (वय 50, रा. वरूड जऊळका, जि. अकोला) यांचा असल्याचा दावा नातेवाइकांनी केला. सदर व्यक्ती बियाणे कंपनीत विभागीय व्यवस्थापक म्हणून काम करीत होते. सुनील घनबहादूर यवतमाळ येथे 16 ऑक्‍टोबरलाच आले होते. तेव्हापासून ते लॉजमध्ये वास्तव्यास होते.

हेही वाचा - सोशल मीडियामुळे संस्कृती लोप पावण्याच्या मार्गावर;...

सहा नोव्हेंबरपासून त्यांचा नातेवाइकांशी संपर्क तुटला होता. दरम्यान, पुतण्या आकाश घनबहादूर याने मिसिंगची तक्रार पोलिसांत दिली होती. बुधवारी सकाळीच ठाणेदारांची भेट घेऊन पुतण्या अमरावतीला पोहोचला होता. त्यानंतर ही घटना उघडकीस येताच आकाशला यवतमाळला बोलावण्यात आले. त्याने कपड्यावरून मृतदेह काकाचा असल्याचा दावा केला. मात्र, डीएनए टेस्ट करावी लागणार असल्याचे पोलिस सूत्रांनी सांगितले. आत्महत्येमागील नेमके कारण कळू शकले नाही. यासंदर्भात अधिक माहिती जाणून घेण्यासाठी ठाणेदार धनंजय सायरे यांच्या मोबाईलवर संपर्क साधला. मात्र, त्यांच्याकडून प्रतिसाद मिळाला नाही.