सोशल मीडियामुळे संस्कृती लोप पावण्याच्या मार्गावर; निमंत्रण पत्रिका, शुभेच्छा पत्रांचा विसर

अचलपूर (जि. अमरावती) : सण, उत्सव, वाढदिवस, थोर पुरुषांच्या पुण्यतिथी, जयंत्या, अभिनंदन, आभार निमंत्रण यांच्यासह लग्नपत्रिका, मरण पावलेल्या व्यक्तीची कार्यक्रमाची पत्रिका अशा विविध प्रकारच्या आमंत्रण पत्रिका तथा शुभेच्छा सोशल मीडियाच्या माध्यमातून देण्यात येत आहेत. त्यामुळे पाहिजे त्या पद्धतीने थेट संवाद होत नसल्याने त्याचे समाजमनावर विपरीत परिणाम होत असल्याचे दिसून येत आहेत.

आधुनिक तंत्रज्ञानाच्या अतिवापरामुळे मोबाईलवरच सुंदर दिसणाऱ्या विविध प्रकारच्या इमेज तयार करून सोशल मीडियाच्या माध्यमातून अभिनंदनाचा वर्षाव करण्यात येत आहे. सणासुदीला तर सकाळपासून किंवा आदल्या दिवसापासूनच अभिनंदनाचा वर्षाव केला जातो. त्यामुळे मणसामाणसांतील थेट संवाद हरवला आहे.

जाणून घ्या : नागपुरात आतापर्यंत रेफर करण्यात आलेल्या तब्बल ७५ टक्के कोरोनाग्रस्तांचा मृत्यू; आज ११ जण दगावले

प्रत्येकाच्या मोबाईलमधील फेसबुक, व्हॉट्‌सॲपचा चॅटबॉक्‍स शुभेच्छांनी पूर्ण भरून जात असल्याचे सांगण्यात येते. मोबाईलमध्ये आलेल्या क्रांतीमुळे युवक युवतींकडून व्हॉट्‌सॲपचा माध्यमातून विविध प्रकारच्या नवनवीन इमेजेस तयार करून एकमेकांना पाठविले जातात. त्यामुळे प्रत्यक्षात भेटून अभिनंदन तथा शुभेच्छा देण्याची परंपरा संपत असल्याचे चित्र आज सर्वत्र दिसून येत आहे. याबाबत तालुक्‍यातील काही तरुणांच्या प्रतिक्रिया जाणून घेतल्या असता त्यांनी मोकळ्या मनाने प्रतिक्रिया दिल्या.

नाते संपण्याचा धोका
सोशल मीडियाच्या युगात थोडीफार संस्कृती ग्रामीण भागात शिल्लक असल्याचे दिसून येत आहे. मात्र शहरात तर लुप्त होण्यातच जमा आहे. शहरात सण, उत्सव नावापुरते साजरे केले जातात. सोशल मीडियाच्या अतिवापरामुळे नाते संपत चालले आहे.
- अविनाश चुडाह, परतवाडा.

अवश्य वाचा : अमरावतीत दुचाकी चोरांचा धुमाकूळ सुरूच; शहरात तयार होताहेत नवनवीन टोळ्या

स्वतःच घ्यावा निर्णय
व्यस्त जीवनात सोशल मीडियाचा वापर महत्त्वाचा ठरत आहे. तेवढाच घातकही ठरत आहे. आज फक्त फायदा पाहण्यात येतो, कोणीही नुकसान काय होत आहे, याची पर्वा करत नाही. यासाठी स्वतःच निर्णय घेण्याची वेळ आली आहे.
- ओम घाटे, अचलपूर

भेटीगाठी झाल्या बंद
दहा पंधरा वर्षापूर्वी मित्र असो की, नातेवाईक कोणत्याही प्रकारच्या शुभेच्छा, अभिनंदन भेटल्यावरच द्यायच्या. आता मात्र प्रत्यक्षात न भेटता सोशल मीडियाच्या माध्यमातून शुभेच्छांचा वर्षाव केला जातो. या प्रकारामुळे आपली संस्कृती लोप पावत चालली आहे.
- अनिकेत गिऱ्हे, कांडली.
 

(संपादन : दुलिराम रहांगडाले)