आठवडाभरात दुसऱ्या हत्तीचा मृत्यू; देखभालीसंदर्भात शंका

गडचिरोली : राज्यात प्रसिद्ध असलेल्या एकमेव शासकीय हत्ती कॅम्प कमलापूर येथे शुक्रवारी (ता. ६) आणखी एका हत्तीचा दुपारच्या सुमारास मृत्यू झाला. सलग दुसऱ्या हत्तीच्या मृत्यूने वनविभाग तसेच वन्यजीव प्रेमींमध्ये खळबळ उडाली आहे. मृत्यू झालेल्या हत्तीचे नाव अर्जुन असून, तो दीड वर्षाचा होता. त्याच्या मृत्यूचे कारण अद्याप स्पष्ट झालेले नाही. एकाच आठवड्यात दोन हत्तींच्या मृत्यूने हत्ती कॅम्पमधील हत्तींच्या देखभालीसंदर्भात शंका उपस्थित केली जात आहे.

अवघ्या चार दिवसांपूर्वी मंगळवारी (ता. ३) पहाटे सई नावाच्या तीन वर्षांच्या मादी हत्तीचा मृत्यू झाला होता. तिच्या मृत्यूचे नेमके कारण अजूनही अस्पष्ट असताना व शुक्रवारी आणखी एका हत्तीचा मृत्यू झाला. आठवड्याभरात दोन हत्तीचा मृत्यू झाल्याने दोन हत्तींच्या मृत्यूची चौकशी करण्याची नामुष्की सिरोंचा वनविभागावर ओढवली आहे.

यापूर्वी २९ जून २०२० रोजी ‘आदित्य’ नावाच्या ४ वर्षीय हत्तीचा मृत्यू झाला होता. ११ जून २०२० रोजी आदित्य हा चिखलात अडकला आणि त्याची प्रकृती बिघडली होती. वनविभागाने त्याच्यावर उपचार सुरू केले होते. मात्र, कर्मचाऱ्यांच्या दुर्लक्षितपणामुळे त्याचा मृत्यू झाला होता. त्याचवेळी कमलापूर वनपरिक्षेत्राच्या कार्यप्रणालीवर प्रश्नचिन्ह निर्माण झाले होते.

शुक्रवारी मृत्यू झालेल्या हत्तीचे नाव ‘अर्जुन’ असून, मंगला या हत्तीणीने १५ जानेवारी २०१९ ला मकर संक्रांतीच्या दिवशी त्याला जन्म दिला होता. केवळ दीड वर्षाचा असलेल्या या हत्तीच्या मृत्यूचे कारण गुलदस्त्यात आहे. सिरोंचा वनविभागाअंतर्गत येत असलेल्या अहेरी तालुक्यातील कमलापुरातील शासकीय हत्ती कॅम्पमध्ये हत्तीच्या देखभालीकडे दुर्लक्ष व आरोग्याबाबत हेळसांड होत असल्याचा आरोप वन्यजीवप्रेमींकडून करण्यात येत आहे.