लॉकडाऊनमुळे कुत्र्यांवर आलीय हिरवा पाला खाण्याची वेळ

भंडारा : मुक्‍या जनावरांनासुद्धा माणसांप्रमाणेच अन्न, पाण्याची गरज असते. मानव बोलून संवेदना व्यक्त करू शकतो. मात्र, मुके प्राणी विविध हालचालीतून आपल्या भावना व्यक्त करतात. कुत्रा हा प्राणी माणसाचा हुशार मित्र आहे. तसेच तो माणसाच्या कृतीचे अनुकरण करत असतो. माणसाचे अवलोकन करून जनावरेसुद्धा अशीच कृती करत असल्याचे जाणवत आहे. लॉकडाऊनचा परिणाम म्हणून कुत्रे आता झाडांचा पालापाचोळा खाऊन जीवन जगत आहेत.

Video : अहवाल आला आणि टाळ्यांचा गजर झाला...

जिल्ह्यात लॉकडाऊन झाल्यामुळे हॉटेल बंद, मटण, मासोळीची दुकाने शहराच्या बाहेर गेली आहे तसेच नागरिकांनी घरातील शिळे अन्न बाहेर फेकणे बंद केले आहे. त्यामुळे मोकाट कुत्र्यांवर उपासमारीची वेळ आली. परिणामी, अन्न, पाण्याविना एका कुत्र्याचा मृत्यू झाला. आपला बांधव मेलेला बघून एक-एक करता अख्खे दहा ते बारा कुत्रे एकत्र येऊन त्यांनी त्या कुत्र्यावर अंत्यसंस्कार करून मुके जनावरे असलो तरी आमच्या भावना, संवेदना माणसाप्रमाणेच आहेत, हे दाखवून दिले.
लॉकडाऊन असल्याने अनेक ठिकाणी कुत्र्यांवर उपासमारीची पाळी आली आहे. आता कुत्रे अन्नाऐवजी झाडांचा पालापाचोळा खाऊन आपली भूक मिटविण्याचे प्रयत्न करीत असल्याचे प्रत्यक्षदर्शी राहुल मेश्राम यांनी सांगितले. चक्क तीन ते चार कुत्रे हे आंबेडकर वॉर्डातील एका झाडाचा पाला खाताना एक दिवस नाही तर चक्क दहा दिवस दिसले. यामुळे आता कुतुहल निर्माण झाले आहे.

भुकेमुळे ही कृती
शरीरातील एखादा घटक द्रव्य कमी झाला की, कुत्रे दगडाला चाटतात किंवा उलटी करायची झाल्यास गवत खातात. मात्र, एकापेक्षा अधिक कुत्रे झाडांची पाने खातात. हा केवळ लॉकडाउनचा परिणाम असू शकतो.
- डॉ. गुणवंत भडके
पशुधन विकास अधिकारी, लाखनी.