लसीचे दोन्ही डोस घेतल्यानंतरही कोरोनाचा संसर्ग, फेब्रुवारीतच झाले होते लसीकरण

गडचिरोली : कोरोना प्रतिबंधित लसीचे दोन्ही डोस घेतल्यानंतरही ज्येष्ठ समाजसेवक तथा 'आम्ही आमच्या आरोग्यासाठी' या संस्थेचे संस्थापक डॉ. सतीश गोगुलवार व शुभदा देशमुख यांना कोरोनाचा संसर्ग झाला आहे. सध्या दोघेही येथील जिल्हा सामान्य रुग्णालयाच्या कोरोना कक्षात उपचार घेत आहेत.

हेही वाचा - क्रीडा संकुल, मंगल कार्यालयांचा उपयोग होऊ शकतो? उच्च...

डॉ. सतीश गोगुलवार व शुभदा देशमुख मागील अनेक वर्षांपासून गडचिरोली जिल्ह्याच्या दुर्गम भागांतील आदिवासींचे जीवनमान उंचावण्यासाठी आम्ही आमच्या आरोग्यासाठी ही संस्था स्थापन करून कार्य करीत आहेत. त्यांचे निवासस्थान व कार्यालय कुरखेडा येथे आहे. कोरोनाचा वाढता संसर्ग बघता त्यांनी आधीच कोरोना प्रतिबंधक लस घेतली होती. फेब्रुवारी महिन्यातच त्यांचे या लसीचे दोन्ही डोस पूर्ण झाले होते. तरीही त्यांना कोरोनाने गाठल्यामुळे लसी क्षमतेवरच प्रश्‍नचिन्ह उभे राहिले आहे. बुधवार (ता. 7) डॉ. गोगुलवार व शुभदा देशमुख यांची आरटीपीसीआर चाचणी करण्यात आली. या चाचणीचा अहवाल गुरुवार (ता. 8) सायंकाळी प्राप्त झाला. अहवालात दोघेही कोरोना पॉझिटिव्ह असल्याचे नमूद होते. त्यानंतर गुरुवारी रात्रीच त्यांना गडचिरोलीच्या जिल्हा सामान्य रुग्णालयात दाखल करण्यात आले. येथील कोरोना कक्षात त्यांच्यावर उपचार सुरू आहेत. 

हेही वाचा - दुर्दैवी भावाला बघता आलं नाही बहिणीचं लग्न, पत्रिका वाटायला गेला अन् सर्वच संपलं

धोका कमी होतो -
यासंदर्भात डॉ. सतीश गोगुलवार यांच्याशी संपर्क साधला असता कोरोना संसर्ग झाला असून जिल्हा सामान्य रुग्णालयात उपचार घेत असल्याचे त्यांनी सांगितले. सध्या दोघांचीही प्रकृती बरी आहे. कोरोना प्रतिबंधक लस घेतल्यानंतरही कोरोनाचा संसर्ग होणारच नाही, याची खात्री नाही. मात्र, ही लस घेतल्यानंतर कोरोना झाल्यावरही या आजारातून लवकर बरे होण्यास मदत मिळते. कोरोनाचा धोका कमी होतो, असे सांगण्यात आल्याचे ते म्हणाले.