ऊन, वारा, पावसातही त्यांचा संसार जीर्ण घरातच...घरकुल लाभार्थ्याचे स्वप्न अधुरे

सालेकसा (जि. गोंदिया) : वर्षभरापूर्वी घरकुलासाठी अर्ज केले. नवीन घराचे स्वप्न रंगविले. मात्र, हे स्वप्नच अधुरे राहिले आहे. आमगाव खुर्द येथील नंदलाल परसमोडे यांची ही व्यथा आहे. अर्ज करूनही घरकुल मिळाले नसल्याने पडक्‍या जीर्ण घरातच त्यांचे वास्तव्य सुरू आहे. ऊन, वारा, पावसाचा त्यांना सामना करावा लागत आहे.

कोरोना विषाणूचा प्रादुर्भाव रोखण्यासाठी संपूर्ण देशात लॉकडाउन करण्यात आले आहे. गोंदिया जिल्हा ग्रीन झोनमध्ये मोडत असल्याने जिल्ह्यातील सर्व व्यवसाय आणि आस्थापनांना परवानगी देण्यात आली. मात्र शासकीय कर्मचारी कोरोनामुळे काम उशिरा होत असल्याचे सांगत आहेत.

प्लॅस्टिक, ताडपत्रीने झाकले घर

सालेकसा नगरपंचायतीमध्येसुद्धा सध्या अशीच परिस्थिती बघायला मिळत आहे. आमगावखुर्द येथील रहिवासी नंदलाल परसमोडे यांनी घरकुलाकरिता अर्ज केला होता. त्यांच्या अर्जाला वर्षपूर्ती होत असून अद्याप त्यांच्या अर्जावर काहीही कार्यवाही झाली नाही. सध्या त्यांचे घर मोडकळीस आले आहे. ताडपत्री, प्लॅस्टिक अंथरूण त्यांनी घर कसेबसे बांधून ठेवले आहे. महिनाभरात पावसाळ्याला सुरुवात होणार असताना मात्र परसमोडे यांच्या चिंता वाढल्या आहेत. पावसाळ्याच्या आधी घराचे काम पूर्ण न झाल्यास त्यांना उघड्यावर संसार थाटावा लागणार आहे.

घरकुलाची फाईल गेली कुठे?

विशेष म्हणजे, नंदलाल परसमोडे यांच्या मागून अर्ज करणाऱ्यांचे घरकुलाचे काम पूर्ण झाले आहे. मात्र नंदलाल यांना "तारीख पे तारीख' मिळत असून त्यांचा घरकुलाची फाईल कुठे गहाळ झाली, हे नगरपंचायतीलाच ठाऊक. पावसामुळे घर नुकसानग्रस्त होऊ शकते, त्यामुळे पावसाळा सुरू होण्याआधी घरकुलाचे काम सुरू करावे, अशी मागणी लाभार्थी नंदलाल परसमोडे यांनी केली आहे.

हेही वाचा : नक्षलवाद्यांशी दोन हात करणारे जवान करताहेत आता हे काम...वाचा

गरजू लाभार्थी वंचित
आपल्या निकटवर्तीय लोकांचे घरकुलाचे काम आधी करण्याच्या नादात अत्यंत गरजू लाभार्थी वंचित ठेवण्याचे काम नगरपंचायत करीत आहे.
- ब्रजभूषण बैस, तालुकाध्यक्ष, मनसे.