पतीचे जुळले एका शिक्षिकेशी सुत...पत्नीकडे केली दहा लाखांची मागणी

सकाळ वृत्तसेवा
अमरावती : नोकरी करणाऱ्या पत्नीला राजीनामा देऊन सोबत राहा, अन्यथा दहा लाख रुपये दे, अशी मागणी केली. ती पूर्ण न केल्यामुळे बळजबरीने तिचा गर्भपात करून घेतला. त्यानंतर दुसरीसोबत त्याने संसार थाटला.
अंजनगावसुर्जी पोलिसांनी याप्रकरणी पीडित विवाहितेच्या पतीसह तिचा छळ करणारी पतीची प्रेयसी आणि इतर दोघे, अशा चौघांविरुद्ध गुन्हा दाखल केला.

सविस्तर वाचा - प्रियकराचा जीव वाचविण्यासाठी प्रेयसीने फोडला हंबरडा

नोकरीत असलेल्या महिलेचा लग्नानंतर तिच्या पतीसह सासरच्यांनी काही दिवसांनी शारीरिक, मानसिक छळ करणे सुरू केले. याच कालावधीत पतीचे एका शिक्षिकेसोबत सूत जुळल्याने पतीने पत्नीकडे घटस्फोट घेण्यासह नोकरी सोडण्याकरिता दबाव टाकला. अन्यथा दहा लाख रुपयांची पत्नीकडेच मागणी केली. परंतु पतीचे लग्नापूर्वीपासूनच एका शिक्षिकेसोबत सूत जुळल्याची माहिती पत्नीला मिळाली. तिने आयुक्तालयाच्या हद्दीत जाऊन शहानिशा केली असता, पती आणि शिक्षिका पती-पत्नीसारखे राहत असल्याचे तिच्या लक्षात आले. याच कालावधीत पत्नी गर्भवती झाली. मात्र पतीने तिला खासगी औषध देऊन तिचा गर्भपात करून घेतला, असा आरोप पीडित पत्नीने अंजनगावसुर्जी ठाण्यात दाखल केलेल्या तक्रारीत केला आहे.