'कर्जामुळे मी आता जगू शकत नाही, पण माझ्या मुलीचे लग्न करा'

सेलू (जि.वर्धा): तालुक्‍यातील केळझर येथील शेतकऱ्याने कर्जाबाजारीपणामुळे राहत्या घरी गळफास घेत आत्महत्या केली. ही घटना सोमवारी (ता. २६)उघडकीस आली असून त्यांनी सुसाईड नोट लिहून ठेवली आहे. त्यामध्ये कर्जामुळे आत्महत्या करत असून माझ्या मुलीचे लग्न करा, अशी विनंती केली आहे. त्यामुळे सर्व परिसरात हळहळ व्यक्त केली जात आहे.

हेही वाचा - नगराध्यक्ष रवींद्र पवार यांचे देहावसान; पुणे येथील खासगी रुग्णालयात घेतला अखेरचा श्वास

योगराज गजानन ईरुटकर (वय ६५)असे मृत शेतकऱ्याचे नाव आहे. त्यांच्याकडे साडेचार एकर शेतजमीन असून त्यावर त्यांच्या कुटुंबाचा उदरनिर्वाह चालतो. त्यांच्यावर जिल्हा मध्यवर्ती सहकारी बँक व भूविकास बँकेचे कर्ज आहे. जुने कर्ज असल्याने शासनाच्या कर्जमाफी योजनेचा लाभ मिळाला नाही. जुन्या थकबाकीदार शेतकऱ्यांना यातून दूर सारल्याने कर्जाचे ओझे डोक्‍यावर घेऊन ते शेती करीत होते. पण यावर्षी सोयाबीनने दगा दिला. नापिकीमुळे सोयाबीनचा खर्चही निघाला नाही. वरून थकबाकीचे वसुलीसाठी बँकांचा तगादा सुरू झाला. यामुळे नैराश्‍यात आलेल्या या शेतकऱ्याने शेवटी मरण पत्करले. दसऱ्याच्या दिवशी रात्रीला सगळे झोपी गेले असताना गळफास घेऊन आत्महत्या केली. 

हेही वाचा - विदर्भवाद्यांना खुणावतेय पदवीधर विधान परिषदेची निवडणूक!

सोमवारी सकाळी शेजारी राहणाऱ्या मुलाने आवाज दिला असता हा प्रकार उघडकीस आला. मृत्यूपूर्वी या शेतकऱ्याने लिहून ठेवलेल्या चिठ्ठीत बँकेच्या कर्जामुळे मी आत्महत्या करीत असून घरच्यांना सहकार्य करून मुलीचे लग्न करा, अशी विनंती  गावातील आपल्या मेहुण्याला केली आहे. तसेच यात घरच्यांचा काही दोष नाही, असेही त्यात लिहिले आहे. या घटनेची माहिती मिळताच सेलू ठाण्याचे सहाय्यक पोलिस उपनिरीक्षक विजय कापसे, नारायण वरठी, बाळू डवरे यांनी घटनास्थळी भेट देऊन पंचनामा केला.