Farmer Crop Loss: मोहळी-कोहळी येथील नामदेवराव काळे यांच्या साडेआठ एकरातील तूर, कपाशी नष्ट; ‘एक धोती घेऊ शकत नाही, हे प्रेस्टिज आहे कास्तकाराची’

मोहळी- कोहळी (जि. नागपूर): ‘एक धोती घेऊ नाही शकत, हे प्रेस्टिज आहे कास्तकाराची. काय साल काढनं? आनं कसा जेवणार?’ नामदेवराव बापूराव काळे म्हणाले. लक्ष्मीपूजनाच्या दिवशी त्यांच्या काटोल-कळमेश्वर मार्गावरील शेतीला मुख्यमंत्र्यांनी भेट दिली. ‘ईश्वकृपेने हे सगळे घडले’, या शब्दात त्यांनी आनंद व्यक्त केला. ‘मी स्वयम ओरिजनल शेतकरी आहे. साडेआठ एकराचा, ’ असे परवलीचे वाक्य ते वारंवार वापरत होते. लोहारी सावंगा येथे शेतकऱ्याच्या घरी मुक्काम करीत दिवाळी साजरी केल्यानंतर मुख्यमंत्री नागपूरला परतताना त्यांनी मोहळी-कोहळी शिवारातील नामदेवराव यांच्या शेतीला भेट दिली.