कर्जमाफीच्या यादीत नव्हते नाव म्हणून शेतकऱ्याने केले तेच...

देऊळगाव राजा (जि.बुलडाणा) : कर्जमाफीच्या यादीत नाव नसल्याने निराश झालेल्या वृद्ध शेतकऱ्याने पाण्याच्या टाकीला गळफास लावून आत्महत्या केल्याची घटना बुधवारी (ता.18) सकाळी अंढेरा पोलिस ठाणे हद्दीत घडली.

हेही वाचा- पोलिस गस्तीवर; चोराच्या नजरा दानपेटीवर

दोन एकर शेतीवर बँकेसह खासगी कर्ज
याबाबत अंढेरा पोलिस सूत्रांकडून प्राप्त माहितीनुसार, चिखली तालुक्यातील पिंपळवाडी शिवारात आज सकाळी 11 वाजेच्या सुमारास एका वृद्ध शेतकऱ्याचा मृतदेह पाण्याच्या टाकीला गळफास घेतलेल्या स्थितीत आढळला. हा वृद्ध शेतकरी उत्तम रोडू सपकाळ (वय 70) रा. पिंपळवाडी, ता.चिखली येथील असल्याचे उघडकीस आले. मृतक शेतकरी अल्पभूधारक असून, त्यांच्या दोन एकर शेतीवर बँकेसह खासगी कर्ज होते. दरम्यान, कर्जमाफीच्या यादीत नाव आले नाही म्हणून ते वैफल्यग्रस्त झाले होते. मृतक शेतकऱ्याचा पुतण्या सुरेश लक्ष्मण सपकाळ रा. पिंपळवाडी यांच्या फिर्यादीवरून अंढेरा पोलिसांनी आकस्मिक मृत्यूची नोंद केली आहे. पुढील तपास पोलिस करीत आहे.