सिंधी गावावर पसरली शोककळा; विजेचा धक्का लागल्याने बाप-लेकीचा घटनास्थळीच दुर्दैवी मृत्यू

राजुरा (जि. चंद्रपूर) : तालुक्यातील सिंधी गावातील शिवारात पिकांना पाणी देण्यासाठी गेलेला स्वप्नील सत्यपाल चहारे (वय ३२ वर्ष ) व मुलगी सेजल स्वप्नील चहारे (५ वर्ष) या बापलेकींचा मोटार सुरू करताना विजेचा धक्का लागल्याने जागीच दुर्दैवी मृत्यू झाला. ही घटना शनिवारी (ता. ३) सकाळी ११ वाजताच्या सुमारास सिंधी शेत शिवारात घडली. यामुळे परिसरात शोककळा पसरली आहे.

प्राप्त माहितीनुसार, राजुरा तालुक्यात खरीप हंगामात पिकांना पाणी देण्यासाठी अनेक गावांमध्ये मोटरपंपद्वारे शेतीला सिंचन केले जाते. तालुक्यातील सिंधी शेतशिवारात पिकांना पाणी देण्यासाठी स्वप्नील चहारे व मुलगी सेजल चहारे हे दोघेही शेतावर गेले होते. मोटर सुरू करण्यासाठी जवळ गेला असता मोटरला करंट असल्यामुळे स्वप्नील चहारे याला विजेचा धक्का लागला.

अधिक वाचा - जेवताना पोळी कधी आणि किती खावी? जाणून घ्या आहारतज्ज्ञ डॉ. कविता गुप्ता यांच सल्ला

यावेळी मुलीने वडिलांना वाचवण्याचा प्रयत्न केले. यात तिलाही विजेचा धक्का लागल्याने घटनास्थळीच बापलेकीचा दुर्दैवी अंत झाला. घटनेची माहिती गावात पसरताच शोककळा पसरली. घटनेची माहिती विरूर ठाण्याला देण्यात आली. यानंतर पोलिस निरीक्षक कृष्ण कुमार तिवारी यांनी घटनास्थळी भेट दिली. प्रभारी उपविभागीय पोलिस अधिकारी अनुज तारे यांच्या मार्गदर्शनाखाली पोलिस निरीक्षक कृष्णकुमार तिवारी पुढील तपास करीत आहे.

दोघेही एकुलते एक

मृत स्वप्नील हा आई-वडिलांना एकुलता एक मुलगा होता. तर मुलगी सेजल ही सुद्धा आई-वडिलांची एकुलती एक मुलगी होती. चहारे कुटुंबीयांवर आलेल्या दुर्दैवी संकटामुळे गाव नि:शब्द झाला आहे.

संपादन - नीलेश डाखोरे