लग्नाची तारीख ठरवायला गेलेल्या बापलेकाचा मृत्यू

तिरोडा (जि. गोंदिया) : तिरोडा कृषी उत्पन्न बाजार समितीचे सभापती डॉ. चिंतामन रहांगडाले यांच्या चारचाकी वाहनाचा वडेगाव सर्रा गावच्या गामखोरी नाल्याजवळ दुचाकीसोबत अपघात झाला. या अपघातात दोन दुचाकीस्वारांचा जागीच मृत्यू (Father And son died) तर गाडी चालकाचा गोंदिया येथे नेत असताना मृत्यू झाला. ही घटना रविवारी घडली. अपघात ऐवढा भीषण होता दुचाकी व चारचाकीचा चेंदामेंदा झाला.

प्राप्त माहितीनुसार, जितेश संपत आहाके (रा. कोडेबर्रा, मंगेझरी) याचा ईश्वरदास भलावी (रा. कोडेलवारा, कोयलारी) यांच्या मुलीशी लग्न जुळले होते. रविवारी जितेशचा मोठा भाऊ प्रताप संपत आहाके (३६), वडील संपत हुर्री आहाके (६५) व नातेवाईक हिरदेवसिंग आसाराम टेकाम (७०, रा. मंगेझरी) हे लग्नाची तारीख (८ मे २०२२) ठरवून कोडेलवारावरून कोडेबर्राकडे ट्रिपल सीट दुचाकीने निघाले.

मागून साळ्याच्या लग्नाहून येत असलेले कृषी उत्पन्न बाजार समितीचे सभापती डॉ. चिंतामण रहांगडाले यांच्या चारचाकी वाहनाने तिरोडा साकोली रस्त्यावरील सर्रा गावाजवळील गामखोरी नाल्याजवळ दुचाकीला जोरदार धडक (Road Accident) दिली. या घडकेत दोघांचा जागीच मृत्यू (Father And son died) झाला व एकाला तिरोडा उपजिल्हा रुग्णालयात दाखल केले. तिथून जिल्हा रुग्णालय गोंदिया येथे रेफर केले असता वाटेतच निधन झाले.

या अपघातात डॉ. चिंतामण रहांगडाले हे सुद्धा जखमी झाले. त्यांना उपचारासाठी गोंदिया येथे दाखल केले आहे. घटनेची माहिती मिळताच परिसर हादरला होता. या घटनेने नुकतेच घडलेल्या वर्धा अपघाताची आठवण ताजी झाली. या घटनेची चौकशी पोलिस निरीक्षक योगेश पारधी यांच्या मार्गदर्शनात सहायक पोलिस निरीक्षक अभिजित जोगंदड, पोलिस नायक पुंडलीक ऊके करीत आहे.