मुलीची लग्नपत्रिका वाटपास जाताना काळाचा घाला; अपघातात वडील ठार तर आई गंभीर जखमी

लाखनी (जि. भंडारा) : मुलीच्या विवाहाची लग्नपत्रिका वाटपास जाताना दुचाकीला सुसाट आलेल्या ट्रेलरने धडक दिली. यात पती जागीच ठार तर पत्नी गंभीर जखमी झाली. ही घटना केसलवाडा (वाघ) फाटा येथे शनिवारी सकाळी घडली. मृताचे नाव दिलीराम कवडू वाघाये (वय ५२) असे आहे.  तर संगीता दिलीराम वाघाये (४५) असे जखमीचे नाव आहे. गंभीर जखमी झालेल्या संगीता यांच्यावर रुग्णालयात उपचार सुरू आहे.

केसलवाडा येथे वाघाये दांपत्य दुचाकीने (क्र. एमएच ३६/सी ९०१०) लाखनीकडे मुलीच्या लग्नाच्या पत्रिका वाटपासाठी जात होते. केसलवाडा फाटा येथे महामार्ग ओलांडताना भंडाराकडे भरधाव जाणारा ट्रेलरने (क्र. आरजे ०४/जेए ८३२२) दुचाकीला जोरदार धडक दिली. या अपघातात दिलीराम वाघाये यांचा डोक्‍यावरून ट्रेलरचे चाक गेल्याने घटनास्थळीच मृत्यू झाला. तसेच दुचाकीवर मागे बसलेल्या संगीता वाघाये यांच्या हात व पायाचे हाड मोडल्याने गंभीर जखमी झाल्या.

"माझं बाळ मला परत द्या हो"; दीपाली चव्हाणच्या आईचा टाहो; उपस्थितांच्याही डोळ्यांत पाणी

अपघाताची माहिती मिळताच गावकऱ्यांनी घटनास्थळावर गर्दी केली. त्यांचा जेएमसी कंपनी विरोधात रोष वाढल्याने तणावाचे वातावरण निर्माण झाले होते. लाखनी पोलिस ठाण्याचे पोलिस निरीक्षक मनोज वाडिवे व सहकारी संजय कोरचे, अमोल तांबे, भगवान थेर, दिगंबर तलमले, जतिन दासानी, अनिल राठोड यांनी परिस्थिती नियंत्रणात ठेवून मृतदेह ग्रामीण रुग्णालयात पाठविला. यावेळी जमावाने मृताच्या कुटुंबाला जेएमसी कंपनीकडून आर्थिक मदतीची मागणी केली होती. अपघातग्रस्त ट्रेलर पोलिसांनी जप्त केला आहे.

तासाभरातच बुजविले खड्डे

केसलवाडा फाटापासून लाखनी स्मशानभूमीपर्यंत राष्ट्रीय महामार्गावर उड्डाणपुलाचे बांधकाम जेएमसी कंपनी करत असल्याने वाहतूक सर्व्हिस रोडने सुरू आहे. त्यामुळे ठिकठिकाणी खड्डे पडलेले आहेत. दुरुस्तीबाबत अनेकांनी मागणी केली. पण काही उपयोग झाला नाही. आज अपघातात जीवित हानी होताच तासाभरातच कंपनीने सर्व्हिस रोडवरील खड्डे बुजविले. यामुळे कंपनीच्या कारभारावर प्रश्नचिन्ह निर्माण झाले आहे.

जाणून घ्या - किन्नर उत्तमबाबावर कारागृहात सामूहिक अत्याचार; आईला फोनवर सांगितली माहिती

२१ एप्रिल रोजी होते मुलीचे लग्न

दिलीराम यांची मुलगी स्नेहा हिचे लग्न २१ एप्रिल रोजी होणार आहे. यासाठी पत्रिका वाटण्याचे काम सुरू होते. शनिवारी सकाळी दिलीराम हे पत्नी संगीता यांच्यासह केसलवाडावरून दुचाकीने निघाले. केसलवाडा (राघोर्ते), किटाळी, पालांदूर, पेंढरी या गावात नातेवाइकांना लग्नपत्रिका देण्याचे ठरविण्यात आले होते. दरम्यान, राष्ट्रीय महामार्गावर केसलवाडा फाट्यावर लाखनीकडे वळत असताना भरधाव येणार्‍या ट्रेलरने दुचाकीला जबर धडक दिली. त्यात दिलीराम जागीच ठार झाले. तर त्यांची पत्नी संगीता गंभीर जखमी झाली.