इलेक्ट्रो होमिओपॅथी दुकानाला भीषण आग; तब्बल १० लाखांचं नुकसान; यवतमाळमधील घटना 

यवतमाळ : आयुषी इलेक्ट्रो होमिओपॅथी दुकानाला आग लागल्याने जवळपास दहा लाख रुपयांचे नुकसान झाले. ही घटना सोमवारी (ता.22) दुपारी दोन वाजता दरम्यान दत्त चौकातील (संत सेना चौक) नगरपालिकेच्या गाळ्यात घडली.

भाजी मंडीतील पालिका गाळ्यात आयुषी इलेक्ट्रो होमिओपॅथी नाचाचे दुकान आहे. दुकान बंद असताना दुपारच्या सुमारास आतमधून धूर येताना दिसला. आगीची घटना लक्षात येताच गजबजलेल्या दत्त चौकात एकच खळबळ उडाली.

हेही वाचा - आज कलेक्टर डिक्लेअर सुट्टी; कॅलेंडरच्या तारखेतून घडला मेळघाटातील पहिला जिल्हाधिकारी

 या घटनेची माहिती मिळताच तत्काळ अग्निशमन दलाचे दोन बंब घटनास्थळी दाखल झाले. आग दुसर्‍या माळ्यावर धुमसत असल्याने विझविताना अग्निशमन दलाच्या पथकाला चांगलीच कसरत करावी लागली. आगीत पाच लाखांचे फर्निचर, होमिओपॅथी जिमचे साहित्य, काही मशिनरी, पाच लाखांची औषधी जळून खाक झाली. 

आयुषी होमिओपॅथीच्या संचालक ममता बैस यांचे सेंटर असून, प्रदीप मेंडे यांच्या नावे दुकान आहे. घटनास्थळी तहसीलदार कुणाल झाल्टे यांच्यासह नगरपालिकेच्या अधिकार्‍यांनी भेट देऊन आढावा घेतला.

नक्की वाचा - ‘मला अंत्ययात्रेला का जाऊ दिले नाही’ असे वडिलांनी...

व्यावसायिकांची झाली पळापळ

आग धुमसत असल्याचे दिसताच इतरत्र आग पसरण्याच्या भीतीने व्यावसायिकांनी आपली दुकाने बंद केली. तर, भाजी विक्रेत्यांची दुकाने हटविण्यात आली. आग बघण्यासाठी झालेल्या गर्दीवर अवधूतवाडी पोलिसांनी नियमंत्रण मिळविले.

संपादन - अथर्व महांकाळ