मोठा अनर्थ टळला! पोलिसांना नक्षलवाद्यांचा घातपाताचा कट उधळण्यात यश; गडचिरोलीतील घटना 

गडचिरोली : कुरखेडा उपविभागाअंतर्गत येणाऱ्या मालेवाडा पोलिस मदत केंद्राच्या हद्दीतील जंगलात नक्षलवाद्यांचा घातपाताचा कट उधळून लावण्यात गडचिरोली पोलिस दलाला यश मिळाले आहे.

या परिसरात नक्षलवादी मोठ्या प्रमाणात एकत्र आले आहेत आणि ते दरवर्षी नक्षल्यांकडून पाळले जात असलेल्या टिसीओसी नक्षल सप्ताहाच्या पार्श्‍वभूमीवर घातपात करण्याची शक्‍यता असल्याची गोपनीय माहिती पोलिस अधीक्षक अंकित गोयल यांना मिळाली. गोपनीय माहितीच्या आधारे पोलिस अधीक्षक अंकित गोयल यांच्या मार्गदर्शनात व अपर पोलिस अधीक्षक (अभियान) मनीष कलवानीया यांच्या नेतृत्वात खोब्रामेंढा, हेटाळकसा जंगल परिसरात गडचिरोली पोलिस दलातील सी-६० चे जवान नक्षलविरोधी अभियान राबवीत होते.

हेही वाचा दीपाली चव्हाण आत्महत्या प्रकरण: शिवकुमारच्या बंगल्याची झाडाझडती; धारणी पोलिसांची...

या अभियानादरम्यान शनिवार (ता. २७) सकाळी ७ वाजताच्या सुमारास जंगलात तीन वेगवेगळ्या ठिकाणी दबा धरून बसलेल्या ६० ते ७० नक्षलवाद्यांनी सी-६० जवानांच्या दिशेने गोळीबार केला. प्रत्युत्तरादाखल जवानांनी नक्षलवाद्यांच्या दिशेने गोळीबार केला. यावेळी सुमारे ६० ते ७० मिनिटे चाललेल्या चकमकीनंतर पोलिसांचा वाढता दबाव पाहून नक्षलवादी घनदाट जंगलाचा फायदा घेत घटनास्थळावरून पळून गेले. 

चकमकीनंतर या जंगल परिसरात सी-६० जवानांनी शोध अभियान राबविले असताना घटनास्थळी ठिकठिकाणी रक्ताचे डाग दिसून आले. त्यावरून या चकमकी दरम्यान एक नक्षलवादी गंभीर जखमी झाल्याची शक्‍यता आहे.

हेही वाचा - गडचिरोलीतील टेंभली परिसरात मृतावस्थेत आढळले विदेशी...

घटनास्थळावरून एक ३०३ रायफल मॅग्झीन काडतुसासह, नक्षल पिट्टू, ३ नग प्रेशर कुकर बॉम्ब, नक्षल डांगरी ड्रेस, दोन सोलर प्लेट, वायर बंडल, सुतळी बॉम्ब तसेच मोठ्या प्रमाणात औषध साठा व नक्षलवाद्यांच्या दैनंदिन वापराचे साहित्य आढळले. यातील ३ नग प्रेशर कुकर बॉम्ब घटनास्थळीच नष्ट करण्यात आले. सी-६० कमांडोच्या या शौर्यपूर्ण कामगिरीचे पोलिस अधीक्षक अंकित गोयल यांनी कौतुक केले आहे. त्याचबरोबर नक्षलविरोधी अभियान आणखी तीव्र करण्याचे संकेत दिले आहेत.

संपादन - अथर्व महांकाळ