Gadchiroli Crime : पत्नीकडे कपडे शिवण्यासाठी येणाऱ्या महिलांचे चित्रीकरण करणारा शिक्षक अटकेत

गडचिरोली - पत्नीकडे कपडे शिवण्यासाठी घरी येणाऱ्या महिला कपडे बदलत असतानाचे चित्रीकरण करणाऱ्या एका शिक्षकास देसाईगंज पोलिसांनी अटक केली आहे. नंदकिशोर भाऊराव धोटे (वय ४५), रा. देसाईगंज, असे अटकेतील आरोपीचे नाव असून, तो कुरखेडा तालुक्यातील एका जिल्हा परिषद शाळेत कार्यरत आहे.

प्राप्त माहितीनुसार नंदकिशोर धोटेची पत्नी घरी महिलांचे कपडे शिवण्याचे काम करते. त्यासाठी दररोज अनेक महिला धोटेच्या घरी येत असतात. शिवलेले कपडे योग्य आहेत की नाही, हे बघण्यासाठी धोटेच्या घरी एक छोटीशी खोली आहे. या खोलीत महिला कपडे बदलून पाहायच्या. हीच संधी साधून आरोपी धोटे एका छिद्रातून आपल्या मोबाईलमध्ये सगळे चित्रीकरण करायचा. ही बाब एका महिलेच्या लक्षात आली. तिने देसाईगंज पोलिसांत तक्रार करताच पोलिसांनी धोटेवर विनयभंगाचा गुन्हा दाखल करून अटक केली.

सोमवार (ता. १५) कुरखेडा न्यायालयात हजर करण्यात आले असता न्यायालयाने त्याला न्यायालयीन कोठडी सुनावली. धोटेकडून दोन मोबाईल जप्त करण्यात आल्याची माहिती पोलिस निरीक्षक किरण रासकर यांनी दिली. दोन मोबाईलमध्ये खरेच त्याने चित्रीकरण केले काय किंवा केले असेल तर नेमके किती महिलांचे चित्रीकरण केले, याविषयीचा उलगडा तपासणीनंतरच होईल.