ग्रामस्वच्छतेचा वेलू गेला गगनावरी!

ग्रामस्वच्छतेचा वेलू गेला गगनावरी!
नागपूर : स्वतःचा परिसर स्वच्छ करण्यासाठी एकाने पाऊल उचलले आणि बघता बघता त्याच्याशी शंभर तरुणांची फौज जुळली. एक वस्ती, एक गाव ते शंभर गावांपर्यंतचा ध्यास घेत मोहीम उभी झाली. निःस्वार्थ सेवेसाठी आठवड्याचा एक दिवस देणाऱ्या या तरुणांनी ग्रामस्वच्छतेचा वेलू गगनापर्यंत नेला. ही कहाणी सरकारी अनुदानातून "गलेलठ्ठ' झालेल्या कुण्या संस्थेची नसून हुडकेश्‍वर (खुर्द) या गावातील तरुणांची आहे.
आपलं गाव मागास वाटणं आणि त्याचं मागासलेपण दूर करण्याची इच्छा बाळगणं, यात खूप अंतर आहे. हे अंतर कमी करण्याचे काम सचिन घोडे यांनी केले. 2014 ला अशाच एका ध्यासाने त्यांना झपाटले आणि हाती झाडू घेऊन परिसर स्वच्छ करण्यासाठी निघाले. प्रेरणा होती महात्मा गांधी, गाडगेबाबा आणि तुकडोजी महाराजांची. सुरुवातीला चार तरुण सोबत आले. भजन-कीर्तन, गाडगेबाबा-तुकडोजींच्या रचना गाऊन गावकऱ्यांचे प्रबोधन होऊ लागले आणि नंतर एकामागोमाग लोक जुळत गेले. निःस्वार्थ अखंड सेवा फाउंडेशन या नावाने संस्थेने बाळसे धरले. बघता बघता 120 तरुणांचा समूह झाला. धामणा, अड्याळी, निंबा, कन्हाळगाव, खरसोली, कळमना, टाकळी, उंबरगावपावनगाव, नरसाळा, आवंडी गाव, आसोली अशा सत्तरहून अधिक गावांमध्ये आतापर्यंत मोहीम राबविण्यात आली. स्वतःच्या खिशातून पैसे टाकून गावात कचराकुंड्या देणे, झाडू खरेदी करणे आदी कामं होऊ लागली. हा पैसाही कमी पडायला लागला तेव्हा गावातील घराघरांमध्ये जाऊन या तरुणांनी तेलाचे पिंप गोळा केले आणि त्यावर "कचरापेटी' अशी अक्षरे गोंदवून गावांमधील लाकडी खांबांवर लावले. शंभर गावांमध्ये स्वच्छता अभियान राबवून ही मोहीम अधिक व्यापक करण्याचा विडा या संस्थेने उचलला आहे. मुख्य म्हणजे मोहिमेत सहभागी होणाऱ्या प्रत्येक तरुणाला तुकडोजी महाराजांच्या गीतेवर हात ठेवून निःस्वार्थ सेवेची शपथ दिली जाते. विशी-तिशीतील हे स्वच्छतादूत पुरस्काराची रक्कमही अभियानासाठीच खर्च करतात, हे विशेष.

आमच्या अभियानाला लवकरच पाच वर्षे पूर्ण होतील. पुढे कचऱ्यातून खत तयार करण्याचा प्रकल्प आम्ही हाती घेणार आहोत. 120 तरुणांची आमची टीम स्वतःच्या खिशातून पैसा टाकून हे सारे काम करीत आहे.
- सचिन घोडे,
निःस्वार्थ अखंड सेवा फाउंडेशन