...अन् मास्कसाठी त्याने फाडले शर्ट; हतोडीने दात पाडल्याचा आरोप

अमरावती : जी बाब कधी कधी सुरक्षित व्यक्तीच्या लक्षात येत नाही, त्यावर सर्वसामान्य गरीब व्यक्ती कारवाईच्या भीतीपोटी का होईना प्रशासकीय आदेशाची तातडीने अंमलबजावणी करतात. त्याचा प्रत्यय पोलिस आयुक्तालयाचे परिसरात घडलेल्या घटनेवरून आला.

एका अशिक्षित गरीब व्यक्तीजवळ मास्क नव्हते, अशा अवस्थेमध्ये तो दुपारी बाराच्या सुमारास हाती तक्रारीचा एक कागद घेऊन पोलिस आयुक्तालयाच्या आत आला. आधी त्याला प्रवेशद्वारावर तैनात पोलिस कर्मचाऱ्यांनी मास्क नसल्याबद्दल हटकले. तरीही तो तक्रार देण्याचे कारण पुढे करून स्वागत कक्षापर्यंत पोहोचला.

तेथे ड्युटीवर तैनात पोलिस कर्मचाऱ्याने चेहऱ्याला मास्क न बांधल्यामुळे त्या व्यक्तीला परत पाठविले. त्याआधी तोच व्यक्ती फ्रेजरपुरा ठाण्यात तक्रार नोंदविण्यासाठी गेला होता. परंतु, तेथेही चेहऱ्याला मास्क नसल्यामुळे पोलिसांनी त्याला परत पाठविले. असे त्याने आयुक्तालयात पोहोचल्यानंतर पोलिसांना सांगितले. परंतु, येथेही त्या व्यक्तीवर तसेच संकट ओढवले. परंतु, तक्रार वरिष्ठ अधिकाऱ्यांना द्यायचीच या उद्देशाने तो पेटून उठला.

अधिक वाचा - भाजपसाठी धोक्याची घंटा! सर्वेक्षणातून समोर आला धक्कादायक निष्कर्ष; नेत्यांची चिंता वाढली

पुन्हा स्वागत कक्षापासून आयुक्तालयाच्या बाहेर गेला. मास्क जवळ नव्हते. खिशात नवीन मास्क घेण्यासाठी पैसेही नव्हते. त्यामुळे त्याने कशाचीही पर्वा न करता आपल्याच शर्टाची एक बाही अर्धी फाडली व त्याचा तुकडा चेहऱ्याभोवती मास्क सारखा गुंडाळला आणि तो पुन्हा आयुक्तालयातील स्वागतकक्षापर्यंत पोहोचला. अखेर ड्युटीवरील कर्मचाऱ्याने तक्रार देण्यासाठी आलेल्या त्या व्यक्तीला येथील वरिष्ठ अधिकाऱ्यांच्या दालनापर्यंत नेले. त्यावेळी त्याने तक्रार दिली.

हतोडीने दात पाडल्याचा आरोप

त्या व्यक्तीजवळ असलेल्या तक्रारीत कुटुंबातील सदस्यांनी घराच्या मुद्यावरून त्याच्यासोबत वाद घातला व हतोडीने तोंडावर वार करून दात पाडले, असा त्याच्या तक्रारीचा आशय होता.