करोनाच्या धाकाने आरोग्य यंत्रणा हाय अलर्टवर

अमरावती : सध्या देशात चीनमधून आलेल्या करोना व्हायरसमुळे भीतीचे वातावरण आहे. आरोग्य यंत्रणेने सुद्धा सर्व जिल्हा आरोग्य अधिकाऱ्यांना "अलर्ट' केले असून संशयास्पद रुग्णांवर नजर ठेवण्याच्या सूचना दिल्या आहेत. राज्यात अद्याप तरी एकही रुग्ण आढळलेला नाही.
चीनमधील हुबेई प्रांतात करोना विषाणुचे काही रुग्ण आढळले असून मुंबई, दिल्ली व कलकत्ता येथील आंतरराष्ट्रीय विमानतळावर बाधित देशातून येणाऱ्या प्रवाशांचे स्क्रिनिंग केले जात आहे. सध्या तरी करोना व्हायरसचा प्रादुर्भाव राज्यात झालेला नसला तरी खबरदारीची उपाययोजना करण्याच्या सूचना देण्यात आल्या आहेत. इन्फ्लूएन्झा सदृश रुग्ण आणि श्‍वसन संस्थेचा तीव्र प्रादुर्भाव, गंभीर श्‍वसन संस्थेच्या प्रादुर्भावातील प्रौढ व बाल वयोगटातील रुग्णांवर विशेष लक्ष राहणार आहे. महाराष्ट्रात राष्ट्रीय विषाणू संस्था, पुणे येथे निदानाची व्यवस्था करण्यात आली असून निदानासाठी रुग्णांचे कोणते नमूने घ्यावेत आणि ते प्रयोगशाळेत कसे पाठवावेत, याची माहिती एनआयव्ही पुणे यांच्या संकेतस्थळावर देण्यात आली आहे. हे नमूने जिल्हा शल्य चिकित्सकांच्या माध्यमातून पाठविण्यात येणार आहेत. विशेष म्हणजे जिल्हा रुग्णालयात गंभीर रुग्णांसाठी व्हेन्टीलेटर तसेच जीवनावश्‍यक प्रणाली सक्षमपणे कार्यरत करण्याच्या सूचना सुद्धा देण्यात आल्या आहेत.

सविस्तर वाचा - मेडिकलमध्ये येणारा रोबोट कुठे थांबला?

जिल्ह्यातील प्राथमिक आरोग्य केंद्र, उपकेंद्र, ग्रामीण रुग्णालय तसेच जिल्हा सामान्य रुग्णालयातील संशयित रुग्णांची माहिती तातडीने घेण्यात येऊन त्यांचे रक्तनमूने प्रयोगशाळेला पाठविण्याची जबाबदारी जिल्हा शल्य चिकित्सक तसेच जिल्हा आरोग्य अधिकाऱ्यांना देण्यात आली आहे. तसे पत्र आरोग्य संचालक अर्चना पाटील यांच्या कार्यालयामार्फत जिल्हा आरोग्य विभागाला देण्यात आले आहे.
अद्याप या व्हायसरचा प्रादुर्भाव नाही
देशात तसेच राज्यात कुठेही करोना व्हायरसचा रुग्ण आढळलेला नसला तरी खबरदारीच्या सूचना आरोग्य संचालकांकडून देण्यात आल्या आहेत. संशयित रुग्ण दिसल्यास तत्काळ वैद्यकीय अधिकाऱ्यांना याची माहिती दिली जाईल. अद्याप या व्हायसरचा प्रादुर्भाव झालेला नसल्याने नागरिकांनी घाबरून जाऊ नये, मात्र स्वाईनफ्लू सदृश लक्षणे दिसताच तत्काळ वैद्यकीय सल्ला घ्यावा. वैयक्तिक तसेच सार्वजनिक स्वच्छता राखणे गरजेचे आहे.
डॉ. दिलीप रणमले, जिल्हा आरोग्य अधिकारी.

अशी आहेत लक्षणे
अचानक तीव्र ताप येणे, खोकला व घसा बसणे, दम लागणे, श्‍वास घेण्यास अडथळा, न्यूमोनिया अशी लक्षणे आढळल्यास वैद्यकीय तज्ज्ञांचा सल्ला घेऊन आवश्‍यक त्या तपासण्या करून घेणे गरजेचे आहे.