लॉकाडाउनचा फटका! महावितरणकडे घरगुती मीटरचा तुटवडा, नवीन जोडणीसाठी प्रतीक्षा

यवतमाळ : महावितरणने पेडिंग असलेल्या कृषिपपांना वीजजोडणी देण्यासाठी नवे कृषिवीज जोडणी धोरण जाहीर केले; तर दुसरीकडे घरगुती वीजमीटरचा तुटवडा निर्माण झाल्याने घरगुती ग्राहक वीजजोडणीसाठी 'वेटिंग'वर आहेत. काही ग्राहकांनी स्वत: मीटर विकत आणले असून त्यांना मीटरची रक्कम वीजबिलातून दिली जाणार आहे. 

हेही वाचा - बापरे! मुख्याध्यापिकेसह १६ विद्यार्थ्यांना कोरोनाची लागण, शाळा बंद

गेल्या अनेक वर्षांपासून वीजजोडणीच्या प्रतीक्षेत असलेल्या शेतकऱ्यांना वीजजोडणी मिळत आहे. थकबाकी वाढल्याने वसुलीला गती देण्यात आली आहे. वसुली न झाल्यास कर्मचाऱ्यांवरच कारवाईचा इशारा प्रादेशिक संचालकांनी दिला आहे. दुसरीकडे महावितरणकडे घरगुती वीजमीटरचा तुटवडा निर्माण झाला आहे. त्यामुळे जिल्ह्यातील अनेक घरगुती, वाणिज्यिक ग्राहक वीज जोडणीच्या प्रतीक्षेत आहेत. ज्या ग्राहकांच्या मीटर फॉल्टी आहे. अशा अनेक ग्राहकांच्या वीजमीटरच्या बदलाची मागणी आहे. लॉकडाउनच्या काळात अनेक कंनी बंद होत्या. त्यामुळे उत्पादनही बंद होते. अनलॉकनंतर हळूहळू उत्पादन सुरू झाले. मात्र, त्यानंतर कंत्राट संपला. परिणामी, नवीन कंत्राट निघण्यात विलंब झाला. त्यामुळे पुढील पंधरा दिवसांत स्थिती पूर्ववत होईल, अशी माहिती महावितरणकडून देण्यात आली. त्यामुळे आणखी काही दिवस ग्राहकांना वीजमीटरची प्रतीक्षा करावी लागण्याची शक्‍यता आहे. 

हेही वाचा - क्या बात है! अभियांत्रिकीच्या शिक्षणाला ठोकला राम-राम अन् आता तयार केले थेट 'Search Engine...

महावितरणच्या अधिकाऱ्यांची चुप्पी -
जिल्ह्यात वीजमीटरचा तुटवडा असल्यासंदर्भात महावितरणच्या अधिकाऱ्यांशी संपर्क साधला असता त्यांनी यावर बोलण्यास टाळले. लवकरच प्रतीक्षेत असलेल्या ग्राहकांचा वीजपुरवठा सुरू करण्यात येईल, अशी प्रतिक्रिया त्यांनी दिली. मात्र, वीजमीटर कधी येतील, याबाबत स्पष्ट मत व्यक्त केले नाही. 

प्रतीक्षा यादी लांबलचक -
महावितरणकडे आधी कृषिपंपांची प्रतीक्षा यादी असायची. ज्येष्ठतेनुसार यातील जोडणी केली जात होती. वीजमीटरचा तुटवडा निर्माण झाल्याने आता सिंगल फेज मीटरसाठीही नागरिकांची प्रतीक्षा यादी तयार करण्यात आली आहे. वीजमीटर उपलब्ध झाल्यानंतर ग्राहकांना वीजजोडणी मिळणार आहे.