मुलीच्या अंगावर पाणी सांडल्यावरून चाकूहल्ला

टेकाडी (जि.नागपूर) ः वर्गातील मुलीच्या अंगावर पाणी सांडल्याच्या निमित्ताने सोळा वर्षाच्या शालेय विद्यार्थ्यांवर वर्गातीलच एकाने चाकूने वार करून जखमी केल्याची घटना सोमवारी (ता. 17) रात्री आठच्या सुमारास घडली. घटनेतील मारेकरी तिन्ही विधिसंघर्ष बालकांनी हल्ला करून जीवे मारण्याचा प्रयत्न केला. गुन्ह्यांतर तिघेही आरोपी नागपूरला पसार झाले होते. कन्हान पोलिसांनी आरोपींना मंगळवारी शोध घेऊन त्यांच्याविरोधात गुन्हा दाखल केला आहे.

अधिक वाचा- काश! मै भी अपनों से प्यार कर पाता ; ऑटोचालकाची आत्महत्या

तिन्ही मारेकरी विधिसंघर्ष बालक पोलिसांच्या ताब्यात
तिन्ही बालक कन्हान येथील असून विधिसंघर्ष आहेत. मिळालेल्या प्राथमिक माहितीनुसार, या तिन्ही आरोपींनी सोळा वर्षीय केतन संजय पगारे (रा. राधाकृष्णनगर, कन्हान) याच्यावर चाकूने वार केला. त्यात केतन जखमी झाला. आरोपी घटनास्थळावरून लगेच पसार झाले होते. जखमी केतन पगारे हा धर्मराज विद्यालय कन्हान येथे दहाव्या वर्गात शिकतो. सोमवारी शाळा आटोपल्यानंतर शिकवणीवर्ग करून तो घरी परतत होता. शिकवणीवर्गात शुभम (काल्पनिक नावे) त्याच्या शिकवणीवर्गात "बॅचमेट' होता. शिकवणीवर्गात केतन याच्या हातातून एका मुलीच्या अंगावर पाणी सांडले. त्यावर केतन आणि शुभम यांच्यात शाब्दिक चकमक झाली. शिकवणीवर्ग संपल्यानंतर शुभमने घडलेला प्रकार राहुलला सांगितला. यावर भूमेश याने त्याचा भाऊ कमल याला सोबत घेऊन केतन याच्यावर शिवनगर येथे चाकूने सपासप वार केले. त्याच्या शरीरावर चार जबर घाव करून केतनला जखमी केले. रक्ताच्या थारोळ्यात केतनला रस्त्यावर टाकून आरोपी घटनास्थळावरून पसार झाले.

अधिक वाचा- प्रियकराचा झाला अपमान; प्रेयसीने काढला चाकू

दरम्यान, प्रत्यक्षदर्शींनुसार मारेकरीदेखील जास्त वयाचे नसून अल्पवयीन असल्याचा अंदाज वर्तविण्यात आला होता. घटनेची माहिती मिळताच पोलिसांनी जखमी केतनला मेयो रुग्णालयात उपचारारार्थ हलविले. घटनास्थळाचा पंचनामा करून आरोपींचा शोध सुरू केला. मंगळवारी तिन्ही आरोपींना अटक करून गुन्हा दाखल करण्यात आला. तपास डीवायएसपी पूजलवार यांच्या मार्गदर्शनात एपीआय नंदा पाटील, अमितकुमार आत्राम, वीरेंद्रसिंह चौधरी, आतिश मानवटकर यांनी केला.