(Video) ठेंगण्या पुलामुळे नागरिकांच्या जीवाला घोर, वारंवार तुटतो संपर्क

कारंजा (जि. वर्धा) : तालुक्यात सकाळपासून पावसाला सुरुवात झाली.  यात कुठे रिमझिम तर कुठे मुसळधार पावसाने हजेरी लावली. एवढ्याच पावसात तालुक्यातील अनेक भागातील नदी नाल्याला पूर आला. नारा- साहूर राज्य मार्गावरील सावरडोहनजीक खडक नदीचा पूल कमी उंचीचा असल्याने याठिकाणी अनेकदा पूर आल्याने पुलावरून पाणी वाहत असल्याने नागरिकांची तारांबळ उडते. 

पुलावरून पाणी वाहत असल्याने दोन्ही बाजूने नागरिकांना बराच वेळ थांबावे लागते. पुलावरून पाणी वाहत असल्याने पूर्णतः रस्ता ठप्प होतो. यामुळे दोन्ही कडेला वाहनाच्या रांगासह नागरिकांची मोठी गर्दी होते. पुलाची उंची वाढवण्यासाठी सार्वजनिक बांधकाम विभागाकडे मागणी केली आहे, मात्र याकडे दुर्लक्ष होत आहे.

अल्पशा पावसातही पुलावरून पाणी वाहते. यामुळे जवळपास 10 ते 15 गावांचा संपर्क तुटतो. अशावेळी एखादी इमर्जन्सी आल्यास  मोठी पंचाईत होते. तालुक्याच्या संपर्क तुटल्याने कोणतेही वाहन ये-जा करू शकत नाही. तालुक्याच्या स्थळावर पोहचण्यासाठी आष्टी तालुक्यातून 40 ते पन्नास किलोमीटर फेरा मारून यावे लागते. पाऊस आले की दररोज येतो पूर त्यामुळे पुलावरून पाणी वाहत असले की नागरिकांना मोठा त्रास सहन करावा लागतो. 

सविस्तर वाचा - ते लांब बसून रडत होते; काही नागरिक बघून निघून गेले, पडाटे आले सत्य समोर

 
राजकारण्यांकडून निव्वळ टोलवाटोलवी

निवडणूक आली की या पुलाचा प्रश्न समोर येतो. निवडणूक झाली की प्रश्न संपतो. सदर पूल जिल्हा परिषद सदस्य नीता गजाम व पंचायत समितीचे सदस्य टीकाराम घागरे यांच्या सर्कलमध्ये येतो. मात्र, यांनी पुलाचा प्रश्न कधी गांर्भीयाने घेतला नाही, असा आरोप ग्रामस्थांकडून होतो. 

जीव गेल्यानंतर उंची वाढणार का?
आमच्या गावाजवळील खडक नदीला पाऊस आला की पूर येतो. यामुळे गावाजवळ असलेल्या नारा साहूर रस्त्यावरील पूल आहे. या पुलाला पूर आल्याने अनेक गावाचा संपर्क तुटतो. त्यामुळे नागरिकांना नाहक त्रास होतो. गावात एखादी व्यक्ती आजारी पडली की त्यांना दवाखान्यात नेता येत नाही. त्यामुळे एखाद्याचा जीव गेल्यानंतर पुलाची उंची वाढणार का, रात्रीच्या वेळी पुलावर थांबावे लागते.
राजू गदरे, सावरडोह

संपादन : अतुल मांगे