Maratha Reservation : '...तर परत जाऊ देणार नाही'; शिंदे गटाच्या आमदाराची मराठा आंदोलकांना खुली धमकी?

बुलढाणा : मराठा आरक्षणाच्या मुद्द्यावरून राज्यात सरकार विरोधात संतापाची लाट उसळली आहे. जालन्यातील अंतरवाली सराटी येथे उपोषणकर्त्यांवर लाठीचार्ज केल्यानंतर आंदोलनाला हिंसक वळण लागले. पोलिसांनी आंदोलकांवर गोळीबारही केला असून आंदोलकांनी अनेक गाड्यांची तोडफोड आणि जाळपोळ केली.

त्यामुळे राज्यातील अनेक ठिकाणची एसटी बस सेवा ठप्प करण्यात आली आहे. तर गृहमंत्री देवेंद्र फडणवीस जोपर्यंत आपल्या पदाचा राजीनामा देत नाहीत तोपर्यंत आंदोलन सुरू ठेणार असल्याचा पवित्रा आंदोलकांनी घेतला आहे.

दरम्यान, आज बुलढाण्यामध्ये शासन आपल्या दारी हा कार्यक्रम असून या कार्यक्रमात मराठा आंदोलक आंदोलन करण्यात येणार असल्याची शंका व्यक्त केली जात आहे. तर या कार्यक्रमात राडा केला तर मराठा आंदोलकांना माघारी जाऊ देणार नाही असा खुला इशारा बुलढाण्याचे शिवसेनेचे आमदार संजय गायकवाड यांनी दिला आहे.

"अमरावती किंवा विदर्भाच्या भागात राहणारा सर्व मराठा समाज हा ओबीसीमध्ये आहे. आमच्या आमदार खासदारांना ओबीसीचे आरक्षण आहेच. तरीदेखील हा विदर्भ पश्चिम महाराष्ट्र आणि उर्वरित महाराष्ट्राच्या मराठा समाजाच्या पाठीमागे उभा आहे. आम्हाला आरक्षण असताना आम्ही मोर्चे काढले आंदोलने केलं." असं संजय गायकवाड म्हणाले.

"बुलढाण्यामध्ये आज शासन आपल्या दारी हा कार्यक्रम आयोजित केला आहे. हा कार्यक्रम व्यवस्थित पार पडेल. आमच्या जिल्ह्यामध्ये बंदचा किंवा आंदोलनाचा काही परिणाम होणार नाही. जर कुणी या कार्यक्रमात राडा करण्याचा प्रयत्न केला तर मी त्याला माघारी जाऊ देणार नाही. आंदोलने लोकशाही मार्गाने करावीत. कुणी जर या कार्यक्रमात आंदोलन केलं तर हे लक्षात ठेवा की, मी पण मर्द मराठा आहे. कुणाला सोडणार नाही." अशा इशारा गायकवाड यांनी दिला आहे.