कारंजाच्या आठवडी बाजारात उघड्यावर मांस विक्री; नागरिकांचे आरोग्य धोक्‍यात 

कारंजा (घाडगे, जि. वर्धा) : शहराच्या मध्यभागी पाण्याच्या टाकीखाली आठवडी बाजाराचे दिवशी उघड्यावर मांस सुरू असते. कोरोनाचे काळातही निर्धास्तपणे सुरू असलेल्या या मांसविक्रीमुळे परिसरातील नागरिकांचे आरोग्य धोक्‍यात आले आहे. 

हेही वाचा - सालेकसातील शेतात आढळला मांजरीसारखा दिसणारा प्राणी; जवळ जाऊन बघितले असता अंगाचा उडाला थरकाप

यामुळे जनतेने आरोग्य लक्षात घेऊन उघड्यावर होणारी ही विक्री थांबवावी अशी लेखी तक्रार प्रभाग क्रमांक 12 येथील रहिवासी सामाजिक कार्यकर्ते प्रवीण मुत्तेवार आणि परिसरातील नागरिकांनी नगरपंचायतीच्या मुख्याधिकारी पल्लवी राऊत यांच्याकडे दिली आहे.

शहरात मांसविक्रीसाठी बसस्थानकाशेजारी जागा नेमून दिली आहे. या दुकानात सहा दिवस मटन विक्री होते. परंतु, आठवडी बाजाराच्या दिवशी गावाच्या मध्यभागी असलेल्या पाण्याच्या टाकीखाली वस्तीला लागून उघड्यावर दुकाने लावल्या जतात. यामुळे परिसरात अस्वच्छता निर्माण होऊन जनतेच्या आरोग्याला धोका निर्माण होण्याची शक्‍यता आहे. 

अधिक माहितीसाठी - लग्नाला यायचं बरं का! असं म्हणत दिलं लग्नाचं 'ओलं' निमंत्रण; पत्रिका बघून भलभल्यांना बसला धक्का

यामुळे रोगराई वाढण्याची दाट शक्‍यता आहे. पाण्याच्या टाकीखाली हा सगळा प्रकार होत आहे. यामुळे बाजाराच्या दिवशीसुद्धा इतरदिवसाप्रमाणे रविवारला नगरपंचायतने नेमून दिलेल्या जागेवर बसस्थानकाबाजूला दुकाने लावावी, स्वच्छता राखावी अशी जनतेची मागणी आहे. गावकऱ्यांच्या आरोग्याचे हित लक्षात घेत नगरपंचायतने याबाबत कार्यवाही करून दुसऱ्या सोयीचे ठिकाणी बंद शेड बांधून तिथे मांस विक्री करण्याची तरतूद करावी, अशी नागरिकांची मागणी आहे.