मेळघाटच्या स्ट्रॉबेरीची पर्यटकांना चटक; हिवाळ्यात मागणी वाढली

चिखलदरा (जि. अमरावती) : महाबळेश्वरच्या धर्तीवर चिखलदरा तालुक्यातील मोथा व आलाडोह गावात मागील काही वर्षांपासून स्ट्रॉबेरीची लागवड करण्यात येत आहे. मेळघाटच्या आदिवासी बांधवांनी हा प्रयोग यशस्वी करून दाखविला आहे. येथील स्ट्रॉबेरीची चटक आता पर्यटकांनाही लागली आहे.

स्ट्रॉबेरीचे नाव घेतले की, महाबळेश्वर नजरेसमोर येते. चिखलदरा आणि महाबळेश्वर या दोन ठिकाणांच्या वातावरणात भौगोलिकदृष्ट्या बरेच साम्य आहे. सुरुवातीला मातीपरीक्षण करून प्रायोगिक तत्त्वावर या ठिकाणी स्ट्रॉबेरीची लागवड करण्यात आली. त्यानंतर शासनाच्या मदतीने शेतकऱ्यांनी स्ट्रॉबेरीची लागवड सुरू केली.

आता हेच शेतकरी स्वखर्चाने स्ट्रॉबेरीची लागवड करीत आहेत. मोथा व आलाडोह गावातील स्ट्रॉबेरीची ही शेती पर्यटकांच्या आकर्षणाचे केंद्र ठरत आहे. स्ट्रॉबेरी म्हटले की, लालबुंद गोड आणि दिसायला छान, असे हे फळ खायला आणि हातात घ्यायची हौस पर्यटक आवरू शकत नाहीत. विदर्भातील पर्यटकांसाठी ही एक वेगळीच पर्वणी ठरत आहे.

विदर्भातील जे पर्यटक महाबळेश्वरला जाऊ शकत नाहीत, ते चिखलदरा तालुक्यातील मोथा व आलाडोह या दोन गावांतच महाबळेश्वरचा आनंद घेऊ शकतात. कित्येकांना तर मेळघाटच्या स्ट्रॉबेरीची चटक लागली आहे. स्ट्रॉबेरीचा हंगाम हा हिवाळ्यात असतो. या हंगामात पर्यटक स्ट्रॉबेरीसाठी या ठिकाणी येतात. त्यामुळे शेतकऱ्यांना बरेच उत्पन्न मिळत आहे.

पीकविम्यात स्ट्रॉबेरीचा समावेश करा

शासनातर्फे सोयाबीन, तूर, कपाशी, संत्रा यासह अन्य पिकांचा समावेश पीकविम्यात करण्यात आला आहे. नुकसान झाल्यास शेतकऱ्यांना भरपाई मिळते. मात्र, स्ट्रॉबेरीचे नुकसान झाल्यास शेतकऱ्यांवर प्रचंड संकट कोसळते. त्यामुळे स्ट्रॉबेरी फळपिकाचा पीकविम्यात समावेश करावा, अशी मागणी मोथा येथील शेतकरी साधुराम पाटील यांनी केली आहे.